ديوان للشاعر محمد أحمد السديري ,,رحمه الله

[وآثق آلخٌطوُهـ]

الامير الشاعر محمد الاحمد السديري رحمه الله


نسب الشاعر
محمد السديري شاعر علم أصلة من الدواسر القبيلة العربية الأصيلة وهو غني عن التعريف لما له من شهرة واسعة ومكانة كبيرة وشاعرية فذة فهو اديب كبير ساهم في خدمة الادب الشعبي ورقيه وتألقه,
شاعرنا هو محمد بن احمد بن محمد بن تركي بن سليمان السديري - رحمه الله تعالى -

مولده
ولد عام 1340ه تقريبا في مدينة ليلى بالافلاج حيث كان والده اميرا عليها ثم انتقل مع والده الى الغاط ونشأ وترعرع هناك في كنف والده ودرس الابتدائية على يد الشيخ عبدالمحسن المنيع

هواياته
شغف في بداية حياته بركوب الخيل وكان معروفا بسرعة العدو الجري حتى قيل: انه كان يلحق الصعاب من الابل ويمسك بها مارس هوايته المحببة ركوب الخيل والهجن كما انه كان مولعا بالقنص واقتناء الطيور النادرة,,

المناصب
في السابعة عشرة من عمره اختاره الملك عبدالعزيز - رحمهما الله - اميرا على الجوف سنة 1357ه واثبت وجوده ودرايته وكان مما قام به تصفية قطاع الطرق والخارجين على الدولة على الحدود الشمالية والشمالية الشرقية ثم انتقل الى منطقة جيزان عام 1363ه وتولى امارتها ومكث هناك، وعندما ثارت المشاكل على الحدود السعودية اليمنية بعد الاطاحة بالامام يحيى بن احمد سيطر معاليه على الحدود بحنكة ودهاء وعين عام 68ه قائد للفدائيين السعوديين في فلسطين ثم اختاره الملك عبدالعزيز محافظا لخطوط الانابيب وقرر رحمه الله ان يتخذ مدينة عرعر مركزا للمحافظة وكانت حينذاك صحراء قاحلة وخوله الملك عبدالعزيز للتصرف بالاراضي فأسس ثلاث مدن رئيسية هي عرعر والقيصومة وطريف وساعد ذلك على توطين القبائل حتى اصبحت مدن مليئة بالحركة والنشاط والتقدم,
بعد وفاة الملك عبدالعزيز نقل الى جيزان مرة ثانية ثم اعتزل المناصب الا انه عاد وتولى قيادة الجيش بالمنطقة الجنوبية ومكث ثماني سنوات حتى انتهت حرب اليمن

وفاته
قضى بقية حياته متنقلا بين الطائف ومزرعته الخفيات شمال بريدة على طريق حائل حتى داهمته ازمة قلبية حادة لازم الفراش لمدة شهر حتى توفي عام 1398ه بالرياض ودفن بالخفيات في شمال القصيم - رحمه الله - وأسكنه فسيح جناته وقد رثاه عدد كبير من الشعراء بقصائد تدمي القلوب.

[وآثق آلخٌطوُهـ]

قال السديري عقب ماخاطره ضاق



دام الكلام اليوم ماعاد ينطاق
.........................بين الولايف نبرة الشوق غرقا



قال السديري عقب ماخاطره ضاق
.........................بيتن يخلي ضامي القلب يشقا




ياليت ربي ماخلق حب وفراق
.........................والا خلق حب(ن) على غير فرقا



واليوم ضاعت بالمواجيب الاخلاق
.........................صار الغزل بين المواليف يرقا



دارت دواليب الزمن بين الاشواق
.........................يالصاحب اللي من سبايبك نشقا



عنيت لك في عالي الرجم مشتاق
.........................وغنيت لك مع تالي العصر طرقا



عن شوف غيرك شح شوفي ولالاق
.........................وسرقت ماتحت المحاديب سرقا



واليوم طعت اللي بالاشوار بواق
.........................واللي بقى لك بالمحاجير يبقا



من عانقوا دربك قليلين الاوفاق
.........................حالك تغير والبلا وين نلقا



محدن يعالجني سوى شوف براق
.........................واقول مابين الغنادير فرقا



ياهيه يالمشتاق لاعاد تشتاق
.........................ويامعدي المرقاب لاعاد ترقى



آخر نصيحه واحفظه وسط الاعماق
.........................خل الرجم وانزل على راس برقا

[وآثق آلخٌطوُهـ]

ان كان بي عذروب حبي لاهل نجد

ان كان بي عذروب حبي لاهل نجد ....احبها واحب شمة هواها
احبها يوم انها ديرة المجد.... دار تمكن بالضماير غلاها
دار غلاها باجد مهجتي بجد.... دار لنا دار ظلالي سماها
ان غبت عنها الحقت وجد ....على وجد متذكر عقب البطا يرد ماها
يا ما غدا فيها مهار لهن رجد.... من فوقها صيد تروي قناها
اللي نوده يا علي ما وجد.... الله يلحق كل نفس هواها

[وآثق آلخٌطوُهـ]

يامشرف المرقاب خله لمشطون




يامشرف المرقاب خله لمشطون
حول وخل مولع القلب يرقا
خله لمشطون تزايد به الكون
على عشير زود الهجر فرقا
ينوح يوم ان الخلايق ينامون
ويزيد نوحه كل ماسمع ورقا
ياسف له اللى للهوا ما يعرفون
ويا سعود شلانه من الدمع غرقا
وكبده من الغالي بها تسع طعون
والعاشرة ياسعود بالقلب زرقا
محد عشق مثله مع الحضر وضعون
شمر وعنازن وروق وبرقا
طفل يتل القلب تل بلا هون؟؟
يس با الفواد ويسرق الحال سرقا

[وآثق آلخٌطوُهـ]

الله من هم بروحي سهجها




الله من هم
الله من هم بروحي سهجها
بخافى ضميرى فى كنين الحشا لاج
احرمن نار تواقد وهجها
منهاخطر روحى على سلك ديباج
وعين عسى المولى يعجل فرجها
يفوح ناظرها كما عين هداج
استرسلت للدمع من مارهجها
غيظ يكظ عبارها مثل الامواج
كم واحد لة غاية ماهرجها
يكنها لوهو للادنين محتاج
يخاف من عوجا طوال عوجها
هرجت قفاير كض بها كل هراج
يقضب عليك المخطية من حججها
حلو نباة وقلبة اسود من الصاج
اللة خلق دنيا وساع فججها
وعن ما يريب القلب لك كم منهاج
والرجل وان شطت لياليك سجها
عسس تواليها تبشر بالافراج

[وآثق آلخٌطوُهـ]

يقول من عدى على راس عالي





يقول من عدى على راس عالي
رجم طويل يدهله كل قرناس
في راس مرجوم عسير المنالى
يشتاق له مندك بالقلب هوجاس
قعدت في راسه وحيد لحالى
والقلب في لجات الافكار غطاس
وقعدت اعد ابامها والليالى
دنيا تقلب ما عرفنا لها قياس
دنيا تفرق بين غالى وغالى
لو شفت منها ربح يرجع للافلاس
يا ما هفا به من رجال مدالى
ما كنهم ركبوا على قب الافراس
ولا رددوا صم الرمك للتوالى
ولا ثار عج الخيل في كل مرواس
ولا قلطوهن للكمين الموالى
ولا صار فوق ظهورهن شلع الانفاس
في حومة الهيجا لهن اجتوالى
كل يبى من زاية الفعل نوماس
من بينهم عود الجنا والسلالى
مثل البروق الليل الادماس
يقطعك دنيا ما لها أول وتالى
لو اضحكت تبكى وتوريك الاتعاس
يا ابجاد شب النار وادنى الدلالى
واكسر لنا يا ابجاد ما يقعد الراس
فنجال يغدي ما تصور ببالى
وروابع تضرب بها اخماس وأسداس
لعل قصر ما يجيبه اظلالى
ينهد من عالى مبانيه للساس
لى صار ما هو مدهل للرجالى
وملجأ لمن هو يشكى الظيم والباس
بحسناك ما منشى حقوق الخيالى
يا خالق اجناس ومفنى اجناس
تجعل مقره دارس العهد بالى
صحصاح دو خالى ما به أو ناس
لا خاب ظنك بالرفيق الموالى
مالك مشاريه على باقي الناس
وإن ناشنى من بعض الادنين صالى
مانى عن الزلات مخبر وبلاس
كالعنبر الغالى بالأسواق غالى
ولا درهم الفضية على صفر ونحاس
اجزية بالصده جنوب وشمالى
واتلى هوى قلبى اليا هب نسناس
المستريح اللى من العقل خالى
ما هو ولجات الهواجيس غطاس
ما هو بمثلى مشكلاته اجلالى
عجزت اسجلهن بحبر وقرطاس
حملى ثقيل وشلت حملى لحالى
ونصبر على ضيم الليالى والاتعاس
برسي كما ترسي عوالى الجبالى
ما ينهزع حيد عليه القدم داس
متى تربع دارنا والمفالى
تخضر افياضه عقب ما هي بيباس
ونشوف فيه الديدحان متوالى
مثل الرعاف بخصر مدقوق الالعاس
ينثر على البيداء سواة الزوالي
يشرق حماره شرقة الصبغ بالكاس

[وآثق آلخٌطوُهـ]

حل الرحيل وفرقوا شمل الاحباب




حل الرحيل وفرقوا شمل الاحباب
ناس على فرقا الاحبه مغاليل

غدى لهم مع طلعة الشمس ضبضاب
وسالت دموع العين مثل الهمايل

وقفت اراعي سيد تلعات الارقاب
واغضي وهو يغضي بسود مظاليل

بشفاه يظهر ماتخفى بالالباب
وبشفاي افصل له عن الحال تفصيل

اسرار ود بين صايب ومنصاب
نجوى لها باقصى الضماير مداهيل

سراير تنساب من تحت الاجياب
لصدور اطهر من قراح الشهاليل

روحي على حبه لها كم جذاب
ويتل قلبي عذب الانياب بالحيل

لوان حبه يطعن القلب باحراب
ابرى ليا شميت بيض معاسيل

على نقا ماني بغادر وكساب
وبالعرض والله ماندور محاصيل

ماني بمن يجرح عشيره بالاسباب
ويحط له مع كل ريع محابيل

بس الحديث وقرعة الناب بالناب
واظهار مكنون الغلا والتعاليل

عزي لمن مثلي من الحب منصاب
تارد عليه هموم قلبه زعاجيل

اليا رقا مرقاب ناداه مرقاب
بمفارق الخلان شاف الغرابيل

الله لايجزي عريبين الانساب
لو هم على ماقيل سو على الخيل

الي سعوا بافراق وضاح الانياب
وخلوني اجزع من عنا الغبن واشيل

فرقا ومنها القلب وسط الحشا ذاب
وعسى هل الفرقا لهم صافي الويل

عسى يصادفهم من الغيث سكاب
وبله غضب مابيه يمطر لهم سيل

ابيه يجدع مثل قلات الاطواب
منها البرد ينماز كبر المخاليل

وصواعق منها المواليد شياب
والحي منهم ذاهل العقل بهليل

بامر الكريم ومن ترجاه ماخاب
يمطر عليهم مثل ماجا هل الفيل

الا لطيف الروح يذريه بحجاب
كنه براس الطور وهمه ورى النيل

ويرجع علينا جادل يزها الاسلاب
من خلقته مانيش عرضه ولا قيل

به مايعيبه للبعيدين واقراب
حاشا ولا تلقى عليه المداخيل

نقي عرض ولا عشق كل نصاب
الجوهر الغالي رفيع المناويل

وانا يصارحني بلا سر وكتاب
وعن حالته يشرح لي العدل والميل

هرجه على قلبي كما الشهد ينذاب
وقلبي على قلبه يرد المراسيل

كنه بعيني لو غضب كل عتاب
بدر تعلى كوكب الجدي وسهيل

طفل سلب مكنون عقلي والالباب
عليه اجاوب نايحات البلابيل

ياشطون قلبي زجي السر بكتاب
مني لابو غشام زبن المشاكيل

قولي رفيقه من هوى الزين ماتاب
ويرجيه رجو البدو وبل المخاييل

وبالليل ياقف له عن النوم حراب
وكنه يلوج بموق عينه سماليل

[وآثق آلخٌطوُهـ]

مساجله شعريه بين محمد السديري والامير نايف بن عبدالعزيز






قصيدة محمد السديري
انتم حباريكم تخافق بالاقفار
وحنا حبارينا السمك يالسنافي
وبايمانكم شقر سريعات الاطيار
والكل منهن ماضي الفعل وافي
ذكرتني يامير واصبحت محتار
وجاوبت خلج البل حم الشعافي
وذكرت طيب ايامنا سر وجهار
يوم الردي في نومة العصر غافي
مذكور يا نايف ذرا الضيف ومجار
ذكراك في قلب براه الولافي
قلب عن الشدات يامير صبار
ان صد عن طيب الثنا كل هافي


وهذا رد الأمير نايف

يا خال روحتوا لنا ستة اسطار
رفاع المعاني كملتها القوافي
مثايل يختارها كل محتار
مثل الرعاف بجيد ظبي الكشافي
حييت فيها والتحية لها كار
ما غرد القمري بروس الخوافي
ليتك خوي لي الى شبة النار
في مربخ من وقدة الرمث دافي
نبته جديد ما طلع فيه نوار
سقاه مامور من الوسم ضافي
ممطور أمس ولا مشى فيه دوار
فيه الحباري مقبلات مقافي
اشيل فرخ واسهن وقع وطيار
وعلى يسارك اشقر الريش صافي
هذا عدو الخرب للريش نثار
وهذا الى طلع على الجو شافي
ما كدر الخاطر طويلات وقصار
هروج هزيلة من رجال ضعافي
من لابة يردون صعبات الاخطار
ما والفوا نوم الصفر والعوافي
نقضي لنا وقت وندفن لنا اسرار
الصبر زين وخير الأيام تافي
عاداتنا نقصر طويلات الاشبار
وعدونا نسقيه سم زعافي
الى عطل الواجب من الناس حبار
نارد ولو ان الموارد عيافي
نارد حياض وردها حامي حار
وبيماننا مصقلات رهافي
لعيون تلع سوقهن ما بعد بار
حديثهن لمجرح القلب شافي

[وآثق آلخٌطوُهـ]

ياعمير




يا عمير ناولني على الكيف فنجال
بالصين صبه لي على قدر شفي

فنجال يغدي ما تصور على البال
يزيل هم بالفؤاد متخفي

يا عمير في قلبي من الهم ولوال
حرن سعر بالقلب ماله مطفي

يا عمير لا تتبع هوى بعض الازوال
اقبل وخله يالعتيبي يقفي

لا تتبعه يا عمير يا طيب الفال
خله على حوض الرذيله يهفي

ومن لا استشارك لا تعذله ولو عال
يلقى من اجناسه صديقي يلفي

يا بعد فرق الناس رجلي وخيال
والطيب بين مثل حيد مشفي

وان جاك مكار على الناس محتال
لياك مع ما قال لك تستخفي

الناس فيهم للاجاويد ختال
للخبث عن درب الفضيله يلفي

وان حدتك دنياك على بعض الاحوال
اعنز على ليث عرينه يدفي

ما يلتفت في قول شامت وعذال
وان كبرت القالات ما يستخفي

اخطر على المخطين من ليث الاشبال
ومن حقه عدوانه لحقه يوفي

ما هو بخطو البايه الخامل الذال
اللي على الطولات جفنه يغفي

مثل الثمد ما ورده كل الاحوال
ملح بصبخات ورسه يصفي

[وآثق آلخٌطوُهـ]

طيف الموده




يا مل قلب كاوي الحب كاويه
طيف الموده كل يوم يخمه

لي صاحبن بيني وبينه منابيه
يصعب علي الدرب وان جيت يمه

اليا بغيت انساه واترك لطاريه
زوله يصورلي على كل يمه

عيني تبيه وقلبي الدرك يغليه
هو منوتي من لابسات الازمه

غلاي له محدن من الناس يحصيه
يزيد عن زايد غلا ابوه وامه

عليه قلبي يصطفق من محانيه
كن الحنش يا عمير يسقيه سمه

يا عمير والله ما نسينا حسانيه
متى متى شملي لشمله يلمه

عندي وكلن له دليلن يقديه
لو هو يضر الحال يا خف دمه

بعيد دار وعني البعد ناحيه
واغليه لو الناس عندي تذمه

عزي لقلبن داعي الحب داعيه
ان هب ذعذاع الهوى زاد همه

والدمع من عيني على الخد جاريه
هجر النيا وان زاد يزيد غمه

مكملن بالزين من فضل واليه
وبالملح عن كل الغنادير عمه

الزين في وجهه تجلت مواريه
ورد على الخدين محدن يشمه

ان جيت ابقطف زهرتن من نواميه
يضحك وياعد والوعد ما يتمه

لو طاعني يا عمير حبيت اشافيه
ونذرن علي اني لصدري لضمه

لو هو يبيع بالثمن كان نشريه
سمته وعيا لا يبيع ابن عمه

[وآثق آلخٌطوُهـ]

قالوا وحيد وقلت ماعندي اوناس





قالوا وحيد وقلت ما عندي اوناس


وقالوا غريب وقلت بارض بعيده


ابعدت ما بي اشوف ناس من الناس


بعدت عن بعض الملا وتعديده


مطاوع قلبي على كل الاجناس


والبعد عن شوف المكاره يفيده


في وسط نجد اتبع هوا كل نسناس


واطرب لشوف اطيورها وتغريده


اعشق ليالي نجد لوانها ادماس


وايامها عندي جنان سعيده


شمي لعشب رياضها يقءعد الراس


وما فات من ساعات عمري يعيده


شوف الزهر يبعد عنا كل هوجاس


ويريح من قلب الشقا ما يكيده


وحس الرعد في رايح المزن رجاس


دقات عود عند سمعي فريده

[وآثق آلخٌطوُهـ]

علامك تصدي




قلي بعد روحي علامك تصدي
وش مزعلك يا قرت العين وش جاك

يا زين جرحك بالحشا مستجدي
وعز الله اني داله القلب لولاك

حبك لخفاق الضمير متعدي
ولا همي الا من تزعلك ورضاك

يللي على عمري تحدا تحدي
يالله عسى مولاك بالحب يبلاك

يا مورد الخدين بيحت سدي
ارحم عزيزن ذل يدعوك ياسماك

ان غبت عني مالقبي نقدي
غيرك من الافلاك ماعرف الافلاك

كان انت يا لمملوح للحق تدي
اذكر عهدنا يوم تضحك ثناياك

يوم انت صوبي بالغةالي تلدي
وتمد لي بمعاقد الود يمناك

نسيت يا مركز الأنهار ودي
وانا لك الجا من ابوك ودناياك

شف الدموع اللي على صفح خدي
اسبابهن من جور حبك وفرقاك

[وآثق آلخٌطوُهـ]

لولا الرجا واعلل القلب بوعد




لولا الرجا وأعلل القلب بوعود
بوعد خل صار شوقه شفاقه


لولاه ما روضت نفسي على الكود
ومن كل خلق الله عشقته عشاقه


أختار قلبي بالهوى ناعم العود
ماغيره أحد بالمخاليق شاقه


كفل عليه من البهى ستر وعقود
زين المقوام أشابه وجهه دقاقه


إن كان شفته فتح القلب بورود
وإن غاب دايم دمعتي من فراقه


طفل سحر هاروت بشفاه منضود
اللي نهب مكنون قلبي سراقه


ما دام هو موجود فالحب موجود
وسط الضماير مبهمات حلاقه


يا ناس أنا أحبه ولا فيه منقود
وقلبي لغيره ما يعرف الصداقه


يا حبي له بلا سلم وحدود
وفراق روحي من سيايب فراقه




يازين قلبي راحمني يباريك




يازين قلبي راح مني يباريك .. واصبح مقره بين الاضلاع خالي
بالحلم ياسيد العذارى يناجيك .. وبالعلم له وسط الضمير اجتوالي
طابت لي اذكارك وطابت مواريك .. وطابت عمامك يوم طاب الخوالي
ارضيتني وبعالم الحب ابرضيك .. انت الحبيب اللي بديت وبدالي
لعل رب صورك لي يخليك .. تشفي فوادي مابقن الليالي
انا على خافي ضميرك موليك .. في منزل مايسكنه كود غالي
عينك تراعيني وعيني تراعيك .. اشفق من الصايم لشوف الهلالي
نصبح مصابيحك ونمسي مماسيك .. وانا ورا ضنك بعيد المدالي
انا لي ضاعت جهود الشبابيك .. ارسي على صيد الوحش باحتيالي
ياشبة وضحه زينوا فوقها ديك .. تموج للطياح روس المقالي

[وآثق آلخٌطوُهـ]

حياتي كلها صبر وجلاده




حياتي كلها صبر وجلاده
وغيري عايش عيشه سعاده


أنا اللي عاشق بالغي مغرم
غريق في هوا راع القلاده


بعيد عنه بديار بعيده
ولحد جاب لي منه الإفاده


يجيبنه حلوم الليل عندي
وحط الخد للغالي وساده


وإلى مني صحيت وقمت أراعي
ولين الليل يفجعني سواده


تصور لي عزيز ما نسيته
حبيب ما سلى قلبي وداده


عذولي لا تلمني بالموده
جريح هايم في حب غاده


تهل الدمع عيني من عناها
وسفك الدمع للعشاق عاده


نشدت أهل الموده وارشدوني
يقولون الهوا صعب جهاده


أقوله مصخر من روح روحي
حياتي كلها صبر وجلاده




اهل القلوب المريحات




هنيكم يا اهل القلوب المريحات
ترعون بالدنيا مثل رعي الانعام

ناس تنفذ صادر الامر بسكات
لو يفهمون العدل للحيف خدام

فيهم من فنون المذله علامات
ويمثلون ازوالهم كبر الارجام

لو شفتهم صفات فارياهم اشتات
ما من عقول لو تكابرت الاجسام

من عاش ما حاش الثنا والجمالات
ودك يلبس ثوب أسود من الخام

ما ذكر به حي يناجي للاموات
وعزي لمن يرجي عيالن بالارحام

المجد ما يوخذ براحه وراحات
يوخذ بحزم وعزم واقدام واحسام

من لا يخوض اخطارها بالملمات
يعيش بين أوباش واوهام واحلام

ترى الوكاد الفعل ما به مراوات
اصدق من اللي يكتبونه بالاقلام

الذيب يهل العرف ما رافق الشات
والنمر ما والف مفاصيل الاروام

علمن ظهر للناس ما به مناجات
ومن لا يصلي الخمس يكفر ولو صام

ومن لا يفكر بالامور البعيدات
لازم بحق الناس يخطي بالاحكام

تمشي ليالينا والايام عجلات
والله بما يخفي على البعد علام




يامبعدن عني




يا مبعدن عني وانا فيك مفتون
دنياي عقبك ما سوت ربع ساعه

بعدك يزيد القلب كونن على كون
ومن جور حبك صار قلبي رعاعه

خذني معك وانا على السد مامون
واعطيك من فلذات قلبي رتاعه

وارفق بقلبي يا حبيبي على الهون
حي يودك يا اريش العين راعه

ما فيك بخل لصاحبك يا اسمر اللون
وهو الذي ما قلت يا زين طاعه

يا روح روح الروح منك اطلب العون
واللي يودك منك يبغي الشفاعه

غاليك قلبه من عنا البعد مشطون
ويقنب قنيب الجايعات السباعه

يعول عويل وخافي القلب مطعون
عليك يتبع خفقته باندفاعه

قلبي معك يا هايف الخصر مقرون
متولعن بك صار مثل الوداعه

حبك يخج القلب بسهوم وطعون
وعليك وصله بالرجا وانقطاعه

اعطف عليه بجاه من له يصلون
قلب هواك من المعاليق لاعه

يمشي بشف رضاك لشفاك مرهون
يا زين حمر شفاك فيهن متاعه

الحب للعشاق يا عمير مسنون
وحي نوده ما بغيره طماعه

يا عميرما طعت به ناس يعذلون
مالي سواه بخلق ربي بضاعه

[وآثق آلخٌطوُهـ]

ونة عتب




قلت آه من صبر صبرته على الكود
من ونتن للقلب جاحت وقدت

ونة عتب ونة غضب ما لها حدود
يا ليتها عن مغلق الصدر صدت

لو هي بحيد ذوبت كل جلمود
على الضماير بالهضايم تحدت

قامت تعرض لي والايام والسود
ان قلت قفت عودت لي وردت

ان قلت هانت بالحشا جابت الزود
وجاحت خفايا ضامري واستجدت

وزادت جروح القلب بجروح ولهود
دنياي مالت عن سنعها ولدت

والعين كن بنونها ملح بارود
على السهر كل الليالي تحدت

تسهر وبعض الناس هجاع ورقود
وحي تبي فرقاه ما فيه لدت

ونشدت يا تركي عن اللي بهم جود
وقالوا ضعون اهل المروات مدت

العدل من شدوا مع الناس مفقود
وبأفعالهم عمسين الاريا تقدت

منزالهم خالي تصافق به النود
من يوم عنه اسلاف الاجواد شدت

اقفوا عن الدنيا هل الخيل والقود
اللي فضايلهم على الناس بدت

اهل الفعول ولبسهم صنع داوود
واهل المهار اللي على الضد كدت

عصمان الاريا مشرعت كل مجرود
ليت الليالي السود عنهم تعدت

الناس بالايام طارد ومطرو
ديا ليتها بأهل المروه تمدت

وطير الفلاح اللي عن الصيد مردود
عقبه تبوع علمت واستهدت

اشوف ناس عندها الحقد ماجود
ونفوسهم عن كل عليا تردت

العدل في ساحاتهم صار مفقود
وعن الفضيله جنبت واستردت

ما يرفعون النفس عن كل مفقود
ان ما تعشت عرضها له تغدت

تعطى عن العليا محاريف وصدود
ووجيهم ما قيل بالجود ندت




كذبت يوم انك تقول اني اخطيت




كذبت يوم أنك تقول أني أخطيت .. وخطاك والله ما يعدد حسابه
ظلمتني ياعزوة الحي والميت .. وكذبك على اليوم كل درى به

ياما على شوفة خيالك تشافيت .. وقلبي كفاه من الغرابيل مابه
أن شفت غيرك صدت النفس وغضيت .. لو هو يهلي قلت له لا هلا به

إن كان شفتك فز قلبي وهليت .. وربع محيل القلب وأزهر جنابه
دنياي تضحك بالسعد كل ما جيت .. وقلبي من الفرحات ينهج بابه

إليا ذكرتك ياعزا الروح ونيت .. وعزي لمن مثلي تزايد عذابه
أقسمت لك باللي فرض حجة البيت .. منساك لو القبر شيدترابه

أنت الذي يانور عيني تجنيت ..ونهبت قلبي من كنينه نهابه
وأنا الذي بسواق حبك تماديت .. وقلبي دخل وادي هواك وعذابه

أبيه يسمع عبرتي والتناهيت .. والحب في قلبي غطس كل نابه
على الذي بآيات حبه تسليت .. طفل سلب مكنون عقلي وذابه

وجدي على لاماه ياليت ياليت .. أبيح زبن ان كان قام وسعى به
اما فزع لي وانتخى شايع الصيت .. والا ترك غاليه ينزف صوابه

من ضيقة بالصدر ياعمير ناديت.. زبن المسمى وين حي نحابه




انا وخلي كل دار وطنا




انا وخلي
أنا وخلي كل دار وطنا
قلبي وروحي كلها له هديه
أنا وخلي كل دار وطنا
عيني وقلبي كلها له هديه
لو التمني ينفع اللي تمنا
ماكان صرت اليوم نفسي شقيه
اشوف كلن مع حبيبه تهنا
وانا حبيب الروح صعب عليه
أنا وخلي كل دار وطنا
عيني وقلبي كلها له هديه
قلبي بحبك ياحبيبي تعنا
ارحم يعل ايام عمرك هنيه
انا وخلي كل دار وطنا
عيني وقلبي كلها له هديه
ان كان سيد البيض بالوصل منا
خطيته ياكبرها من خطيه

[وآثق آلخٌطوُهـ]

ان كان تنشد




ان كان تنشد عن قرايض علومي
يبوهلا قلبي تزايد هيامه

يا سعود مع العين غرق هدومي
يشدي هماليل السحاب انشامه

على عشير كل قومه وقومي
ضدي وضده معلنين القوامه

قلت الوعد قال السما به غيومي
وثر حبيبي خايف من عمامه

عني نحو به قاطعين السلومي
وعليه لحقت الندامه ندامه

من يم خلي ما تجينا العلومي
كن العواني قطعن عن تهامه

عن شوف وضاح الجبين محرومي
والقلب من بد المخاليق رامه

مالي حدا الا عضتي بالبهومي
وساعة فراقه مثل يوم القيامه

طفل على فرقاه تكثر همومي
عنده إذا قلبي وعنده فطامه

بالليل اساهر ساريات النجومي
والصبح اعدي ما نبا من عدامه

غلاه علق بالضماير سهومي
وبالقلب من جرح الموده علامه

الله يلوم اللي لقلبي يلومي
قلب صعب ما ينعذل عن مرامه

قلب صعب قاس قوي عزومي
محد يعذله عن هواه وغرامه

من لا يوده عن غرامه يشومي
ويصد عن درب الخطا والغشامه

يا سعود قم لعل حظك يقومي
وافزع وبشرني بوصل وسلامه




اتحلا




عمير شفت مخفرن يذكرونه
ووقفت في خلق الكريم اتحلا

قلت السلام وقال مالك مهونه
ورديت له ثاني سلامي وهلا

يا عمير صابت بالضماير طعونه
طفلن على مكنون قلبي تولا

له غرتن شقرا جذت عن قرونه
ما هوب في زين الجواهر محلا

قاموا هله بهروجهم يندهونه
قلت اتركوه ابليس بعد وولا

خلوه يالاجواد لا تبعدونه
قالوا تعرفه قلت كلا وكلا

بجاه ربن كلكم ترتجونه
خلوه يقضي حاجته ويتسلا

عليه قلبي كاثراتن غبونه
كن الجراد بثومة القلب فلا

وان قلت لي يا عمير وشلون لونه
زينه على زين العذارا تعلا

خده كما بدرن ظهر من مزونه
عقب المطر عنه السحاب يتجلا

حي نوده حيل دوني ودونه
عليه قلبي بالموده تملا

واحسرتي وان كان قفت ضعونه
عن دارنا لديار حيه مجلا




مرقا العلا




مرقا العلا خطر عسيرن صعوده
ما يطلعه من لا تجلد على الكود

والبيت ما يبنى بليا عموده
والحيف يزعل من عن الحق مردود

الحر يجزع يوم توطا حدوده
واتشرهه نفسه على الطيب والزود

لا يشتكي من لا تضره لهوده
ان شاف جور الحيف والعود مفقود

الوقت شفنا كل بيضه وسوده
وشفنا نهاره مع لياليه مضهود

الغيم لو تسمع صواعق رعوده
لا ممطر وبله ولاهو بمريود

يا مدورين الطيب قيسوا عدوده
فالطيب عد بين الاجواد مارود

والناس بأرض الله تراهم شهوده
وحق بلا فعل على الرجل مجحود

وال؟؟؟ حيلات الردا ما تكوده
واليا بغا الطولات ما يدرك الجود

عن المراجل قاصرات زنوده
طير العشا يصبر على كل منقود

الخيل ما تشكي مضاريب عوده
وبالقيض ما ركب لنضا مثل صاهود

يعيش في دنباه همه رقوده
ولا نفضنه قرح الخيل والقود

لعل رحمة خالقه ما تعوده
وعساه من زمرة هل النار بخلود

هذا زمان هايبات فهوده
والناس نادوا عنتره باسم مسعود

واشوف لي رجل يعدد جدوده
لو ان ابوه وجده اضعف من الدود

كلت من الماطا رواسي حيوده
والبوم شاش ولابس درع داوود

والنيص حط لهامة الراس خوده
عقب المذله له طوابير وجنود

ما كن شي في زمانه يكوده
شاهد ابها الدنيا سلامات وركود

وحتى الغراب اليوم يفجر بجوده
والفار بذراعه قطع كل بالود

والشري والحرمل تباهت وروده
وقامت تشيل غصونه الماس ورعود

يا حسين زانت له ليالي سعوده
وصدق حياه بزايد الوبل ورعود

[وآثق آلخٌطوُهـ]

يقول من بايات فكره تكلم




يقول من بآيات فكره تكلم
آيات مصدرها خفي الضماير


ان دك بي داكوك قمت اتعزم
اخفيه لو أنه على الروح جاير


اخفيه عن من كان لوهو ولد عم
لا قابل شوره ولاهو بشاير


اخاف ابوح السر ثم اتندم
ويدري بسري مفشي السر باير


الناس بلوى الناس بالحكي تظلم
وبعض الصغاير يجعلونه كباير


كم قالتن بالحكي قامت تعظم
كبرت ولو هي من صغار الصغاير


تلقح وعند ولادها ينثر الدم
ويلفحك من حامي هواها سعاير


تالد كسوب وبين الاشرار تتوم
تتوم وبتلاها تجر الجراير


واليا ندهني واحدن قلت له سم
بالطيب قلبي ما تمهل يخاير


ياما على الشدات نصبر ونجزم
ان ضيعت بعض الرجال البصاير


ان قامت الاريا تفرق وتلتم
لاضايع رايي ولاني بحاير


وان كان بعض الناس بالضيق تهتم
امشي بدربي باوسط الضيق ساير


وان شفت منهو من زمانه تهظم
قلت الهظايم للعذارى براير


وان شفت ميلات الزمان إتعظم
بالعزم هو والحزم شفت البشاير


احدن بفعل الطيب يذكر ويحشم
واحدن عن الطولات حاير وخاير


لعل بيته بين الابيات يهدم
هذاك حواش الردى والخساير


يابعد فرق الناس كافر ومسلم
تخيروا يامدورين الذخاير




ونيت




ونيت ونه على غالين ون
عن موت مخلوق يوده هرج له

على اللي عقب ضلوعي تعاون
جاوبت صوت مهرفل الذيب لاجله

حبه بمكنون الضماير تمكن
غصبن علي القلب مني نهج له

ليحان صدري من فراقه تشضن
والقلب من بين الضلوع ارتهجله

يفز قلبي والضماير يلجن
اليا رمع في مدمج الساق حجله

طفلن صفالي بالموده بلا من
عكش رموشه زاهياتن بنجله

عليه قلبي بالحشا كنه الشن
ما غيره احدس بالموده فرج له

كن الدموع اليا ذكرته وفاضن
شط الفرات مخالطه نهر دجله

عزي لمن مثلي همومه تقافن
ومحفي على روس المراقيب رجله




معجزه شعريه




العين شفت الحيف والعدل مرفوع
وبدا يغيب النور عقب انبلاجه

وابعد علينا العدل عن حبة الكوع
وصار الخطر في راكبين الحداجه

وعن الوطا غيث السما صار ممنوع
الله يعجل لامته بانفراجه

قولوا لابو فيصل ترى الشر مزروع
ويصعب عليه ليا تعظم علاجه

لا يترك الدنيا بلا شبوح وطلوع
نخاف من سيل يزيد ارتهاجه

لازم يحط الحبل مثني ومربوع
وايخط درب ما يجي به عواجه

والقصر لو انه من الصلب مصنوع
ان عاب ساسه ما تفيدك ابراجه

والراس ما يفزع ليا صار مقطوع
وللحي ما قالوا شف الميت ناجه

والبيض ما لبسن من الطاس ودروع
والصبح بين ينعرف بانفجاجه

ولا حي الا يعرف الشبع والجوع
ونفسه لها في كل الايام حاجه

اشوف ناس زادوا الخبت بطبوع
والكل منهم قام يرفع حجاجه

ما جربوا غارات طامع ومطموع
ولا دوجوا بالحرب يوم المواجه

في ساعتن فيها الصعب يهتدي طوع
ان صار لافواه المدافع لجاجه

كم واحد في ماقف الطيب مشلوع
ينقص مقامه عقب فعل السماجه

وكم واحد يصعد للافلاك بطلوع
بعز من حديد الصلب ذابه وعاجه

لقيت ناس ما لقي لهلها قوع
وشفنا الفهد والذيب يتلى نعاجه

عزاه يا قلب معذب وملقوع
خيل عليه وضيقت به افجاجه

ناس على نوع وقلبي على نوع
وبيني وبين الناس مثل الزراجه

قلبي صعب حرف الوفا فيه مطبوع
لا شك في ربعه يشوف الحراجه

فيما نشوف بناظر العين مفجوع
وللطيب والله فزته وابتهاجه

[وآثق آلخٌطوُهـ]

قلي هلا




قلي هلا واقول صبحك بالخير
قل مرحبا واقول ياروح روحي

يا بو ثمانن بالمبيسم مغاتير
اغليك وانت اللي تسبب جروحي

جاوبت من فرقاك خلج على ضير
وناديت باسمك والمخاليق توحي

حيثك هواي من البني الغنادير
واليا عذلني واحدن قلت موحي

اغليك ماطاوعت عذال ومشير
وحياة من مشا السفينه بنوحي

قلبي على لاماك يكفخ كما الطير
ماعدلت روعات قلبي فروحي

ورجلي تزيد المشي يمك بتصخير
ولا تعدت يم غيرك شبوحي

وهموم قلبي منك ورد ومصادير
اكن عبراتي ودمعي يفوحي

وشجابني لولا ان هذي مقادير
الا انها كتبت بلوحك ولوحي



عود لبان




ليت عود لبان من يمي يميل
واتفيا في ذرا غصنه ظلال

يا حبيبي ما بقلبي لك عديل
جل من سواك يا بدر الكمال

ضمني بحماك يالظل الظليل
وانعش المفتون يا زين الخيال

هام قلبي في غرامك له دليل
عارفن سيد الملاحه والجمال

دوك جسمي يا بعد روحي نحيل
شف نزيف العين من فرقاك سال

اسمع الونات من قلب عليل
من نوازع عبرته رفرف وجال

والله انه ما خلق جنسه مثيل
بالجنوب والغرب والشرق وشمال

يا حبيبي لا تخليني قتيل
من رحيق شفاك جرعني زلال




ياعمير كانك نايم فانهض الراس




ياعمير كانك نايم فانهض الراس
وان كان قاعد يابن الاجود قم لي
ياعمير انا اخترتك على جملة الناس
ابيك في بعض الامور تحشم لي
واللي شربت بكاس حبه بلاقياس
ياعمير جذ البعد شمله وشملي
متى نشوفه عقب الاقفا والاياس
ومتى السعد عقب الفراق يخطملي
ان غاب تهت بغبة مابها اوناس
وابري الى شفته وعمره سلم لي
يكبر عناي الى اسلمت عنه الارماس
ويضحك زماني وان مشى بالقدم لي
دايم يباريني من الود هوجاس
اما سرى مسراي والاجهملي
باب المودة لي ينادي بالاجراس
والحب عن كل الخلايق قسم لي
بالليل ياقف لي عن النوم حراس
وكثر الهموم الموجعه ترتدم لي
وان هب لي من يمة الشرق نسناس
من شاف حالي بالشتاء ينهضم لي
وان قلت لي ياعمير لاباس لاباس
اقول انا ياعمير ياثقل حملي
ياعمير قلبي والمعاليق يباس
قل للشريعه بالقصاص تحكم لي

[وآثق آلخٌطوُهـ]

يسقيك ياداري شمالي عنازه




يسقيك يادار شمالي عنازه
غرب الولج ياعلي شرق الطريبيل
سقاك نو ممطرا من عيازه
على رغاب القاع فيض من النيل
عز الله انه راح فيها جنازه
صميدع توصف عليه الرجاجيل
له في عازات ولي فيه عازه
بوقت اللزوم اذا حصل بالدهر ميل
مالوم قلبي لو يزيد اهتزازه
وجر الونين وشاف ضيم وغرابيل
عيني كما شن تفتق خرازه
عليه دمعات المحاجر هماليل
حرا جزع وادما بقلبه حزازه
وتفجرت شعبان قلبه مباهيل
تقصر يمين اللي بالايام هازه
يرجع ذليل فاقد العقل بهليل
اللي لمح ضده ثقيل مرازه
اخو محمد صافي الذهن حلحيل
من شبته ياما قطع من مفازه
وياما ظهر من غرقة كنها الليل
رقا سنام المجد والطيب حازه
وبيته لعصمان الشوارب مداهيل
قلبه من البالود ماهو قزازه
والغيض قد فجر قلوب مغاليل
وان داخل الشردان رعب ونزازه
الذل مايلقا عليه المداخيل
هزيم حطوا حفرته بالعزازه
براس الطويله وارفع القبر بالحيل
ومن الذهب حطوا لقبره ركازه
ومن صافي الياقوت حطوا قناديل
حتى يجيه اللي بعيد منازه
ويلقى بقربه شمخ القود والحيل
اعتضتبه ربع لقلبي لهازه
اعني هل العليا عصاة المشاكيل
علمي لياجاهم سريع نجازه
وانا لهم دايم على العدل والميل
هم فزعة المضيوم وهم جهازه
وبالفعل للشعلان تشهد هل الخيل
شعلان فيهم بالحرايب فيازه
بجدع المدرع فوق قب مشاويل
ربع حماهم مايقرب حجازه
وعدوهم أسقوه ويل بأثر ويل
ان حل ضرب مخلص بالبرازه
ارووا حدود سيوف حدب مناحيل
احد يحوش الطيب غصب خزازه
وناس عن العليا ضعاف مهازيل
يبين لك فرق الذهب من بيازه
فرق بعيد ابعد من الجدي لسهيل
البيض ترضع لين يابس غرازه
وبالالف يظهر واحد به تنافيل
تاخذ رفيعين المباني بزازه
ياليتها تقتاض عنهم تباديل
ان قيل قلبك مصخرا بانحيازه
قلت الوفاء له وسط قلبي مناقيل
وانا احمد الله ماحضرني خزازه
وردون ثوبي ضافيات مضاليل
يسقيك يادار شمالي عنازه
مزن من المنشا ركونه مخاييل




الله من قلب يزيد ارتهاجة




الله من قلب يزيد ارتهاجه
يلعب به الهاجوس من كل فجي

كنه على موج البحر فوق ساجه
بعواصف منها البحر مستلجي

الدمع من عيني يزيد انزعاجه
يشدي هماليل السحاب المحجي

على عشير صار للقلب حاجه
متولع به عنه عيا يسجي

طفل لوى قلبي على الحب عاجه
وقلب الشقا طول عليه الترجي

ان قذني بالعين واسفر حجاجه
سهوم طرفه للظماير تخجي
قلبي مريض وشوف خلي علاجه
ومشاهد الغالي (00و00)

قلت المواجه قال مامن مواجه
الليل قمراء والضواري تلجي

ياصاحبي رحماك بالوصل فاجه
حي حياته عند غيرك تلجي

ان جيت لك قلبي يزيد ابتهاجه
ولك كل بيبان الظمائر تهجي

يانور ليلي وانت مشعل سراجه
ياجنتي ماغيرك احد يهجي

الحب مابه ياعشيري لجاجه
وحب ماهو حبي ظلام مدجي

الرجل تمشي لين تاصل مداجه
بارض سقاها كل مزن مدجي

من رايح برقه يزيد التعاجه
وبله حقوق ولا تقفاه عجي




انبيك يامن هو عن الحال نشاد




انبيك يامن هو عن الحال نشاد
شف دوك قلبي من محانيه مفقود

مشيت بدروب عتيقات وجداد
ولقيت بيبان الموده بهن كود

دخلتهن عقب العناء هو والاجهاد
وقبلي دخلهن ناظم الدرع داؤود

مابين حام وسام جور الهوى ساد
في كل قلب شاغل الحب ماجود

كل على ماراد صادر ووراد
عد لكل الخلق بين ومارود

الود قد هدا صليبين الأولاد
البيض تشهد به وتشهد به السود

لي فيه قرر صافي الخد ميعاد
ودخلت ماميزت للنقص والزود

صادفت ملهوف الحشا ظبي الأجراد
طفل عليه من البها ستر وعقود

طفل نفل بالزين غضات الأنهاد
به سحر هاروت وماروت منضود

له قلت راع لحالتي يابن الأجواد
ارفق على قلب من الحب مضهود

لجلج بسود طرفهن للحشا جاد
وادي فؤادي عقبهن تقل مجرود

وخلاني اجرع بالهوى كل ماكاد
كني بوسط الموج تلعب بي النود

ونيت من كود العنا عقب ماكاد
ونة خالوجي على جلد مفرود

ماينفع العشاق ترديد الأوجاد
ان شاف من غاليه ميلات وصدود

من عقب فقده حاربت عيني الزاد
وعيني لها عن لذة النوم راصود

بغيت اجيب اسمه على روس الأشهاد
لولاه يلحقني من الناس منقود

انا ونفسي عقب فرقاه بجهاد
واغضي وكن بناضري يرتكز عود

صبرت واثر الصبر يرث بالاكباد
وخلا فؤادي خافق القلب ملهود

فرقا لطيف الروح لاعاد لاعاد
القلب من فرقاه يرعى به الدود

يازبن قلبي فيه جور الهوى زاد
كنه بما جاء قيس يازبن موعود

من غاب عني ماتهنيت برقاد
قلبي لقلب مغيزل العين مشدود

يمشي معه يازبن في كل ماراد
ماله عن الغالي محاريف وصدود

لو ان قلبي من صليب الصخر باد
ومن المحبه صار به كسر ولهود

يازبن شفت الكود من جور الأنكاد
وحب دخلت احماه حب بلا حدود

الله يذكر من فقدناه بجماد
وانك تلم الشمل ياخير معبود

[وآثق آلخٌطوُهـ]

الصدر ضاق وحاير الدمع دفاق




الصدر ضاق وحاير الدمع دفاق
من ناظرن من حاير الدمع مرهوق

دمع تكبه عين عاشق ومشتاق
ارعد سماها بالغضب ومطر الموق

الا سفح من فوق الاوجان وانساق
يسيل منه معيلت مرتع النوق

محدن رحمني يوم الاقدار غراق
منجور دمعات تكسر بصندوق

صدر من الفرقاء رمع فيه دقاق
ووجس معاليق الحشا يشعلن فوق

فاذا بغيت ادله تذكرت الافراق
طفلا على شل المعاليق مطفوق

طفلا نقل بالزين غضات الاعناق
عزالله انه طالني منه ملحوق

في مامضا دنياي جتلي بالاوفاق
وردت عددهن قبل ماهوب مطروق

جيت الحبيب داله بالكرى راق
ومجوهرات امبيسمه ذقتهن ذوق

يوم انتبه لي صاحبي بعد مافاق
اصبح يعاتبني على الغدر والبوق

يقول مامثلك للجواد سراق
ولاانت على هذا من الناس مسبوق

قلت ارحمو من زاركم ماله ارفاق
ورووس الافاعي بالقدم حطهن سوق

ماله رفيق وبه يضيقن الافاق
واذا جفيتو مايبي كل مخلوق

فطلق حجاجه وبدل الوجه بشراق
وافتر عن بيضاء تكاشف بها اوراق

فنهن سقاني كاس خمرا بترياق
زود على ماصار بالغدر مسروق

احباب لحباب تعاطف بالارياق
وارواح تحيا بين عاشق ومعشوق

هو حط ذرعانه لي افراش وارواق
وانا لويت العضد لمعنقه طوق

ثوبه نظيف ولاوطى فيه عشاق
وثوب الخنا يجوز به كل منطوق




اهلا عدد ما مال ريح بنبنوب




اهلا عدد مامال ريح بنبنوب
من خاطر هرج الردا ماهذابه

أحلى من السلسال في صافي الكوب
وألذ من نقع المطر من ربابه

من خاطر يشفق على كل محبوب
ويجعل رفيقه دون كل القرابة

يكن له ماكن يوسف ليعقوب
ويحمى قفاه بحضربه مع غيابه

ويذريه ما يشكي عنا كل لا هوب
ويزيد له بالطيب عن ماهقى به

العمر من دونه رخيص ومجلوب
ولا يستمع بهروج حي حكى به

نفتح له صدور تذرا ورى جيوب
وعن ما يعيب منزهين شنابه

يا ابن العسيلي مابكم كل معيوب
حاشا ولا في طيبكم مايعابه

لكم على الجودا محاريف ودروب
وراسين مثل المعتلي من هضابه

ودياركم حامينها بكل مسلوب
وياما دخلتوا دونها من حرابة

وياما نثرتوا دونها الدم مسكوب
أروى لعطشان الثرى من ترابه

ياهل السبايا اللي لها الأصل منتوب
معمقات من عصور الصحابة

سلايل من فوقها حرب لحروب
دايم على الردات عوج رقابه

وإن جاء نهار مشعل الحرب مشبوب
فأنتم على الطوعات مثل الذيابة

نعم بكم والسيف مشهر ومقضوب
إن حل بأطراف الجهامة ضبابة

أعني بني سالم ومسروح ووهوب
ما اقولها بأهل الردى والخيابة

وادي الرمة من ولبكم صار مهيوب
بروس البلنزا مبعدين رحابه

وليا غزوا يمه غزاة لقوا شوب
وطبوا على بحر تلاطم غبابه

الطيب لأهل الطيب يذكر ومنسوب
وكل على طوله يفصل ثيابه

والناس في دنياك غالب ومغلوب
وكل على شفه يوجه ركابه

واللي من أفعال الردا فيه شاذوب
هذاك كساب الخناء في شبابه

اختر رفيق بالقسا يقضي النوب
وابعد عن المنزوع قل لا هلا به

[وآثق آلخٌطوُهـ]

الي هتف باسماه قلبي وناداه




اللي هتف باسماه قلبي وناداه
حتى الضلوع بوجدها صفقت له

اللي غرامه تل قلبي من أقصاه
وبالدمع عيني خيلت وامطرت له

اللي عسفت النفس لاجله ولرضاه
والرجل في سمر الغداري عنت له

بيا سبب عهد الهوا ليه ينساه
وينسى تخطي رجلي اللي خطت له

الرجل لو هو نازح الدار تنصاه
على حثاث القاع يا ما مشت له

أموت من فرقاه واحيا بذكراه
والروح خلت جسمه وانتحت له

قولو له أنه عذب القلب وأدماه
وحي يود لقاه ماله بقتله

ياكود والله غيبة عقب لاماه
وعيني بكت فرقاه ثم اخجلت له

ماصاب قيس بحب ليلى توطاه
ولوعات قيس وماجرى له جرت له

مالاق له غيره من الناس مشهاه
ويعاف كل الخود لو عرضت له

ان شاف زوله مغرم القلب يبراه
وان غير صد مايلتفت له

أغليه لامانساه واذكر سجاياه
لوهو بعيد الدار نفسي هفت له

معذبي بالحب وان حل طرياه
اسرار ودي بالضمير اهتفت له

لو هو ظهر للناس وابدى محياه
كل الخلايق بالجمال اشهدت له

عزاه ياقلب على الصبر ماقواه
لو مابغى الفرقا عصت واخطمت له

عزي لمن دمعه على الخد مجراه
ودنياه غيب نورها مااسفرت له

قولو لبن سلوم ابو زيد ينخاه
يوم ان غارات الهوا صادفت له

يتابع الونات من كود ماجاه
لوكثر الونات مافرجت له

يهيم مثل موده وسط مضماه
يذكر سنين بالوداد ضحكت له

ماجت له الدنيا على ماتمناه
وذياب ياسه من حبيبه عودت له

يكفيه من جور الهوا ربع ماجاه
وتغيرت دنياه يوم اوجهت له

قلبه من الحرمان فاخت حناياه
من يوم باقي ايامها ماصفت له

هنيت من حصل مرامه بدنياه
والورق بلحون السعد غردت له

هنيت من حصل مرامه بدنياه
والورق بلحون السعد غردت له

المولع الي في طريق الهوا تاه
لومابغاه اشراك دربه سعت له




ان باعوا الشيمه بدينار وريال




إن صار زود المال بيدين الانذال .. حنا من المعروف تندا يدينا
وان كانهم شرهوا على طيب الافعال .. حنا وردنا جمامها وارتوينا
وان فكروا للجود يمشون رحال .. حنا قبل يمشون يمه خطينا
يا ما لبسنا للشرف كل سربال.. وعلى البسيطة للفضيلة مشينا
في دوحة العربا لنا مجد وظلال .. وحنا على در المكارم غذينا
لو نجمع اللي فات منا من المال .. إن كان شيدنا القصور وبنينا
نعطي ولا نتبع عطانا بالاقوال .. ونبذل ونسكت كننا ما عطينا
وان باعوا الشيمة بدينار وريال .. حنا دخلنا سوقها واشترينا
نطلع لها لو هي على روس الاقذال .. لو هو عسير دربها ما انثنينا
بافعالنا نرسم دروب للاجيال .. إلي نساها غيرنا ما نسينا
أسود سادات تسجل للاشبال .. فضايل شمنا لها واهتدينا
بيض نسجلهن جديدات وسمال .. حفايظ لاحفادنا اللاحقينا
نصبر على الشدات لو شيلنا مال.. لو سال دم دفوفنا ما شكينا
نخاف يلقى سدنا كل ختال .. ويبني هزيلات المعاني علينا
الليل يا خالد على والدك طال .. وهنيت ناس بالكرا نايمينا
يا عز راسي شفت ما خبث البال .. شي يهول شيب الجاهلينا
شي من اسبابه يشيب بالاطفال .. فطر خشوم مهجرعات الحنينا
أدير قالات عريضات وطوال.. قالات خلن المخفى يبينا
منهن رزين العقل بالوقت يهتال .. بوقت عبوس فطن الغافلينا
وقت من اسبابه شكى كل ريبال .. نصبر ونسكت كننا غايبينا
الناس بالأيام راحل ونزال .. وتفجعهم الدنيا وهم دالهينا
وحيات رب نزل آيات الانفال .. عالم خفايا نية الحاقدينا
ما اترك طريق العدل في كل الاحوال .. لو يرحل المريخ للفرقدينا




ياغزال الريم ياظبي الفلا




ياغزال الريم ياظبي الفلا ** ارحم اللي منك عينه ماتنام
ياهلا في شوف زولك ياهلا ** يالطيف الروح خذ مني سلام
ارحم اللي في هواكم مبتلا ** من ودادك نايح نوح الحمام
المحبه والملاحه والهوى ** زاهيات فيك يابدر التمام
باح صبري منك والقلب امتلا ** والله اني في غرامك مستهام
والله اني ماهويت من الملا ** من جميع الناس من حام وسام
كود زولك عنه قلبي ماسلا ** لك فوادي دش في بحر الغرام
ليت من هو ثمانك ينهلا ** حبتك ياصاحبي برد وسلام
مابتليت بحب غيرك لاولا ** زارني طيف سوى طيفك حرام
مبسمك فيه الدوا لوذبلا ** ان ضحكت بليل ينجال الظلام
حبتك تغني عن الما والكلا ** من رحبق شفاك جرعتني مدام
صابغ حبك بقلبي مانجلا ** ياحبيبي مثل دقات الوشام
امتلا قلبي بحبك والغلا ** من عذلني عنك ماسمع له كلام

[وآثق آلخٌطوُهـ]

انا من نجد يكفيني هواها




أنا من نجد يكفيني هواها . . . ويبري لوعتي شربي لماها

وشوفي من نبيه من نوده . . . غزال تابع قلبي هواها

غزال ضيعت عقلي وروحي . . . رمت قلبي وقلبي ما رماها

لها بالروح وفوادي موده . . . ولا شي من احوالي خفاها

تعرف اني لها مملوك طايع . . . ابيع الروح في دورة رضاها

اهيم بحبها واخفي جروحي . . . وقلبي ما عشق زول سواها

توقد حبها باقصى فوادي . . . ونار الحب يحرقني لظاها

ملكني بالهوى عذب السجايا . . . ولا اذكر ساعة قلبي نساها

نحيل الخصر وضاح الثنايا . . . نظيم الدر منظوم بفاها

فجعني بالهوى ورقا حمامه . . . الى غنت يذكرني غناها

يذكرني وليف غاب عني . . . وعيني منه جاها ما كفاها




مساجله بين محمدالسديري والشاعر زبن بن عمير العتيبي




يازبن ودعناك في يوم الاثنين
لعلها لك ياخو صنعا مسافير
بجيرة الله ياعشير الغلامين
يامقفي عنا ذكرناك بالخير
نغليك يوم إنك بعيد عن الشين
وريف لضيفك في ليال المعاسير
يوم تغيبه عندنا قدر عامين
ويوم نشوفك فيه عز وتباشير
هذا الفراق اللي نظرناه بالعين
وعز الله انك ناوي بالمحادير
يازبن يالبراق بالله الى وين
واسلم ورد العلم يازبن العمير


فأجابه زبن بن عمير على الابيات الماضية قائلا


وانا بعد ودعتك الله بتسعين
وداعة من حفظ والي المقادير
ياباذل الحسنى على المستحقين
ونطاح بالضيقات وجه المناعير
ياللي بدرب الطيب جالك براهين
ولبست بالبيضا ثياب مشاهير
يبون دربك ناس واجد وعجزين
يجي لهم من دون دربك عواثير
ولا يختفي فعل به الناس دارين
لين انها تمحى الجبال المزابير
من يوم عنك اقفيت والقلب والعين
عندك,, وفي جسمي تشب السواعير




اسهر طوال الليل واغضي على الحاذ




ياقلبي اللي من هوى البيض معتاذ
واليوم اشوف الوجد والشوق بذه
حسبي على اللي للمواصيل جذاذ
حبل الوصل من بيننا البعد جذه
يسقي منازل لين العود رذاذ
يلقى بها ظبي الطعاميس لذه
الصاحب اللي عن هوى القلب مالاذ
لاقلت دوك القلب يازين غذه
ولانيب من هرجه كثير وهذاذ
ماشاف في ليله نهاره يهذه
عساك تأتي لي يابو زيد نفاذ
قلب تحذى الشور ياخوك حذه

وقد اجابه شاعرنا الامير محمد السديري - رحمه الله - رغم صعوبة القافية الا عليه فانها لا تصعب مهما كانت فقال :


أسهر طوال الليل واغضي على الحاذ
وعن الصديق القلب ما فيه شذه
شكواك خلت بسرة القلب تخاذ
ولا عاد في قلبي من الصبر فذه
اللي يا بو بندر جعل قلبك افلاذ
مشربك ياممدوح الأفعال عذه
طفل سهم عينه بالاعماق نفاذ
والحق عليك بقذة عقب قذه
ان كان مالك فيه مدخل ومنفاذ
له الشبك في مدهل الصيد بذه
وإليا دخل وسط الشبك يابن الافذاذ
غوجك لساعات المهمات حذه

[وآثق آلخٌطوُهـ]

ابو زيد ياليت الدهر ما غدى به




ابو زيد ياليت الدهر ما غدى به
ياليت نفسه توهبت هبوبها
رحل عن الدنيا وذكراه باقية
وسط المجالس معجزاته حكوا بها
ابو زيد نطاح الامور الصعايب
لولا الشهود الناس ما صدقوا بها
الله من ناس تذكر محمد
إليا ابتلتهم مشكلة وابتلوا بها




لولا الهرم والفقر والثالث الموت



لولا الهرم والفقر والثالث الموت

يالادمي بلكون ياعضم شانك

سخرت ذرات الهوا تفهم الصوت

وخليتها اطوع من تحرك بنانك
جماد تكلمها وهي وسط تابوت

تاخذ وتعطي ما صدر من بيانك

وعزمت من فوق القمر تبني بيوت

من يقهرك لوهو طويل زمانك

لولا الثلاث وشان من قر الفوت

نفذت كل اللي يقوله لسانك




يالادمي دنياك هذي تعذبك




يالادمي دنياك

يالله انا من جود حسناك طالبك
عفوك ومدك حيث منت بخيلى

يالادمي دنياك هذي تعذبك
لوطفت فيها مالقيت الدليلى

كل على مذهب امامه يخاطبك
يبيك من زايد ذنوبه تشيلى

واليا عصيت اهل المذاهب تعتبك
كل يقول ابيك يمي تجيلى

واليا عصيت اهل المذاهب تعاتبك
كل يقول ابيك يمي تجيلي

ولو انتحيت بعيد بالسؤتطلبك
وكل بصاعه من ذنوبه يكيلي

احد يصحح لك حديثه ويرهبك
واحد يقول الحق عندي نزيلي

واحد يخيفيك في كلامه ويدبك
وابليس يضحك له وهو مستشيلي

الناس عوجان المناطق تكذبك
وعن الصحيح الكذب معهم بديلي

ان مارضيت بقولهم نتف شاربك
وتكبر ذنوبك لوغناك تهليلي

ناس على درب الفضيله تحاربك
وعلى دروب الشر تهذل هذيلى

ودروبهم عسرات عوج وتتعبك
ما تستوي لك لا ولا تستويلي

ينبيك عن دنياك ماضي تجاربك
وعزي لحالك كان عرفك قليلى

اتبع نبيك واترك اللي مجنبك
واقضب مماشى سنته لا تعيلى

اللي بغار الثور للرشد يندبك
وابوبكر عنده نديم وخليلى

نصايحه للرشد حذرا تغايبك
هرجه صحيح وكل فعله جميلي

سنة نبيك للفضيله تقربك
المصطفى ماله شبيه وعديلي

واحذرك عن نقالة السو تقربك
ومن يتبع العايل لزوم يعيلى

لوانت ما تغضب ترى الناس تغضبك
وعقب المعزه يجعلوانك ذليلى

وترى ردي العرق للعيب يجذبك
وتصير بدروب الردا له عميلي

وبنت الردي حذراك حذراك تعجبك
واحذر تصير لمثل هذي حليلى

وعن ما يعيب النسل عرب مناسبك
وعليك في بنت الحصان الاصيلي

يجي ولدها فارق عن قرايبك
ويقف في وجه الخصيم القبيلي

ان كبرت القالات بالفعل يعجبك
ويبرد همومك كان قلبك غليلي

مثل القطامي في هداده يشببك
والدم من مخلاب كفه يسيلي

ليا صارما صلبين الارياء مكاسبك
تراك بين الناس تبقى هزيلي

وترى دروب الخبث يالعبد تذهبك
ويفوت عمرك ما تحصل حصيلي

احذر يابن حوا تطمن لحاجبك
الا لرب للخلايق يزيلي

الي بعفوه عن عذابه يرغبك
وعينه لكل الخلق دايم تخيلى

في لوحه المحفوظ يا لعبد مذهبك
نزل بحق وكل ما به فضيلى

ومعاشر الخايب مع الناس يذربك
وتصبح قليل الميز عقلك هبيلى

ومعاشر الطيب على الطيب يجلبك
ويرقيك للعليا بظل ظليلي

لا تقرب الأجرب بالامراض يعطبك
يصير جسمك مثل جسمه عليلي

ممشا الخفامن صافي العقل يسلبك
ويصير لك يم الرذيله سبيلي

وعن مارد الانذال نزه مشاربك
واشرب نظيف لوورادك طويلي

ولياك تنسى يابن الأ جواد واجبك
والي يروم المجد حمله ثقيلي

يا لادمي وان كان كبرت مصايبك
ازبن على محي ا لبلاد المحيلى

ازبن على رب بعرشه يراقبك
وناجه وبعد العسر يره جليلي

ناجه ولاجل ارضاه وجه ركايبك
وخلك لعلام السرايردخيلي

هو الذي ينجيك من كود صايبك
ويذريك من كربات هول مهيلي

يا لعبد مكن عند ربك مقضبك
وفكر وقدر وانتبه لاتميلي

ولحدمن الخلاق يالعبد حاجبك
هو الذي مده وعفوه جزيلى

وهو الذي في ما فعلته يحسابك
وهو الذي بارزاق عبده كفيلى

[وآثق آلخٌطوُهـ]

قالوا تتوب






قالوا تتوب وقلت بالطرف مصيوب
والله ماتوب وصافي الخد ماتاب
قالوا تحملت الموائيم وذنوب
قلت الذنوب الها موازين وحساب
قالوا ترى مايفعل العبد مكتوب
قلت افهم اللي تذكرونه يالاصحاب
قالواجهلت وبان بك كل عذروب
وكشفت سرك بين قومك والاحباب
قلت الهوى لقلوب الاحباب مرغوب
ايات حب صورت وسط الالباب
قالوا بعقلك ضايع الفكر منكوب
قلت الموده ماتداويها الاطباب
عقلي معي ماني من العقل مسلوب
انا الغريق وكل شي له اسباب
انا غريق مع هل الحب منسوب
مع زمرة العشاق بالحب منصاب
ما طاب لي زادن ولا اريد مشروب
اليا صفا لي صاحبي عسل الانياب
يغضى بعينه وافهم العلم مقلوب
واسري عليه بليلتن نورها غاب
يرخص لي الغالي اليا حل ماجوب
وعن القرايب حط لي ستر وحجاب
وابعد عن الشكه ولا نوش له ثوب
الاالحديث وقرعة الناب بالناب
اخاف يصبح زين الاوصاف معيوب
وهو عليه من النقا كل جلباب
مما يعيبه طاهر العرض محجوب
ولا حكوافيه البعيدين واقراب
عليه وجدي فايقن وجد يعقوب
وقلبي من اسبابه بوسط الحشا ذاب
كان انكم تدرون بللي شفا ايوب
وجدي سطى بالقلب والحب غلاب
يلومني من لاشكا حب نبنوب
طفلن قرونه ماتغطيه الاسلاب
طفلن نهب عقلي بضحكات وعجوب
فتان لقلوب العشاشيق نهاب
اصبح هو الغالب وانا منه مغلوب
غدا بعقلي بين شاري وجلاب
ان كان شفته صفق القلب مرعوب
وفتحت له بالقلب بابن ورى باب
وان غاب عنى يصبح القلب متعوب
بالصدر كنه بين لاوى وجذاب
والدمع من فوق النظيرين مسكوب
يخضر بدار ممحله عقب الاجداب
اسمه بصفحة مولع القلب مكتوب
دايم يصور لي خياله ولا غاب




قالوا علامك قلت مطعون




قالوا علامك
قالوا علامك باكي قلت مطعون
شوفو نزيف الدم مني تتالا
قالوا من اللي صوبك قالت عافون
قالوعدؤك قالت ياناس لالا
هذا الحبيب الي له القلب مرهون
هذا حيات لبروح بدر الكمالا
يا عاذلين القلب لالاتعذلون
وحيات رب فوق عرشه تعالا
اني فلا انسى واحدفيه مفتون
بيني وبينه نازح البعد حالا
فتان صاب الفاب كون بثر كون
مملوح اخذ كل البها والجمالا
كنه الى حرك قوامه على الهون
غصن الى هب الهوا فيه مالا
قلبي لقلبه لو تنحيت مرهون
غيره حرام ونور عيني حلالا




شي بقلبي ياملا حاير فيه




شىء بقلبى ياملا حاير فيه
شىء تحير به العقول الفهامي

مخفيه بفوادى و لا ودى ابديه
وادور الخيرات شرق وشامي

احترت به ما شفت شىء يحاليه
واليوم أنشد عنه مانى بكامي

سيل حدر مع وادى غير واديه
مدرى حلال ماه والا حرامي

كانه حلال جايز شرب صافيه
وش حلله يامفسرين الحلامي

هاتوا تفاصيله وهاتوا معانيه
نبى الدليل اللى عليه الكلامي

نبي دليل يفهم الدرب ماشيه
يمشي به التايه بليل الظلامي

يمشي به التايه ويقدى مواطيه
ويشرب قراح الما ليا صار ضامي

لاشك هجسي يوم خلا مماشيه
انه حرام ومنه زود الاثامي

احرم من الزقوم مره وحاليه
وشربه على الضامى يزيد الهيامي

الله من قلب همومه تقزيه
تدك به مثل الجراد التهامي

من ما جرى قامت تتله مشاحيه
تل الرشا من فوق هدف المقامي

روابع قامت تصيبه وتخطيه
شاف الهوايل واختلاف الاسامي

ما يسمع الداعى ليا قام يدعيه
يعوم فى بحر من الهم طامي

ما ينتبه للى بصوته يناديه
يزيد همه يوم كل ينامي

يشوف وقت ماعرفناتواليه
وقت يشيب منه ابن الفطامي

هذا زمان كاثرات بلاويه
الغيم يقلب فيه عج وكتامي

يا بعد شرب الما على كبد راجيه
ما سيل الغبرا زعوج الجهامي

انبيك يا من كلمة الحق ترضيه
اعطيك ما ينفعك وافهم كلامي

قصر يذلك لا تقابل مبانيه
خله عسى شامخ طويله هدامي

خله عسى ما صاب اغادير يفنيه
يودع منازله الطويله رجامي

لوزان مدخاله وطالت حواميه
شيد على الخيبه قليل الرحامي

وحى يوريك المذ له وتغليه
أنا أشهدأنك ميت القلب عامي

من لا يودك لا توده وترجيه
ارفع مقامك ياعزيز المقامي

ارفع مقامك عن عدوك وتوذيه
ويلحقك من تركت رفيقك ملامي

حق الرفيق وواجبه لاتخليه
يلزمك مثل الوالدين الحشامي

اخترعزيز الجار والحق يعطيه
شبل على هرج يقوله يحامي

مادك به عرج المذ له وطاريه
يسبق على فعل الفضيله شمامي

ومن قارب الاجرب بالامراض يعديه
عدواه تسطي باللحم والعظامي

درب السلامه بينات مماشيه
ودرب العطب يرث عليك اللكامي

ابعد وقلبك نازح البعد يشفيه
وتلقى عن الدار البغيضه مقامي

دار بدار وداعى الذل عاصيه
ولا تقبل الذ له نفوس الكرامي

الذل موت حايمات ضواميه
ادخل على منزل فروض الصيامي

عن مقعد بالذل عينك تراعيه
الموت عند الذل امان وسلامي

يرضى المذ له من تردت هقاويه
والذل يجفل منه قلب العصامي

والعبد له رب عن الناس يغنيه
ولو لاه ماصاب الهدف كل رامي




عفن الريش





دعيت عفن الريش يوم ادرج الحوم **** ابا لرخم وانا احسب انه نداوي

طيرن بحزات الهدد يلحقه لوم **** اللي قنص به ضايع الفكر غاوي

خسران والخسران من ينقل البوم **** يبشر بخيبات الرجا والبلاوي

طيرن نقلته طالني منه مثلوم **** وبعض الطيور يضيعن الهقاوي

انا احسب انه ساطي القلب ملحوم **** واثره على الصيدات مثل العماوي

الناس في دنياك معطا ومحروم **** وكلن على طيب المعاني شفاوي

الطيب لأهل الطيب والرزق مقسوم **** وطير السعد طير تعدا الحراوي

هقيت به لا شك انا صرت منجوم **** وتوي دريت اني عن الدرب غاوي

من المذله بارد الوجه ماسوم **** وقلبه على درب الرذيله مهاوي

وعديت من جور العنا راس مزموم **** في راس مرقاب طويل المطاوي

رجم طويل نايف كل مرجوم **** دربه عسير به عكاش وملاوي

وهيضت من وسط الحشا كل مكتوم **** زفرات من يقوى لهن كل قاوي

هاذي سوات اللي بالايام مكظوم **** وقلبه على صعب المراجل شقاوي


وانا الوحيد وقومي اكثر من الروم **** وفي لمة العربان كني خلاوي

حتى صديقي صار من حسبة القوم **** وضاعت عزوم مكثرين العزاوي

الطيب من دونه نبا كل مزموم **** ايضا ترى دونه رفاع ومهاوي

وانا اللي جاني من الناس مزحوم **** احل عنه الكايدت الدعاوي

ارخص له النفس العزيزه بلا سوم **** وانا على فعل الجمايل رهاوي

ازيح عنه الظلم وان صار مظلوم **** والقلب من بلواه يرحم وياوي

يا شن بقلبي بين الاضلاع مضموم **** يعلم به اللي عن عباده غناوي

من عاش في دنياه بالفعل مذموم **** عن الردا بالحيل مشيه نحاوي

وعساك ياللي تنقل الكبر والزوم **** من المرض تصلا بحر المكاوي

عيني يابو ماجد حريب لها النوم **** كنه يعالجها الطبيب المداوي

شوف البغيض بنونها عمس وهزوم **** والقلب ناشه بالمعاليق لاوي

انا رفيقي دايمن كل شغموم **** ولاني رفيق الكندره والضراوي

من خلقت الدنيا الى يومنا اليوم **** صبح يفوت وليل يقفاه ضاوي

والناس تفنا بين مذنب ومرحوم **** وهنيت من له عند ربه عراوي

الله لا يسقيك يالواد ابو دوم **** وعساك صحصاح بك الذيب عاوي

خمسين عام ما يقولون ماسوم **** يصحا سماك وكل ما نبت خاوي

يجيك ما جا قوم صالح من الشوم **** والبوم باركانك يجر الحداوي

يالله يا معبود يا فارض الصوم **** تقبل دعات اللي لجودك رجاوي

موحد يطلبك في ثاني التوم **** يرجي العفو ورضاك وامرك سماوي

من خلقت الدنيا الى يومنا اليوم **** صبح يفوت وليل يقفاه ضاوي

والناس تفنا بين مذنب ومرحوم **** وهنيت من له عند ربه عراوي

[وآثق آلخٌطوُهـ]

سلطان شفت الموت مره ومره




سلطان شفت الموت مرة ومرة



والثالثة شفته كشر لى بنابه



ما بيه لكنه بلاني بشره



زود على خيله يجمع ركابه



لو ظهر لي في صحاصيح بره



والله أنا يابوك لعطب صوابه
















وهذه كانت آخر ما نطق به بحياته شعرا



ولله الحمد تم بفضل الله,,



واسف على الاطاله,,



تقبلوا تحياتي ..


منقوووووووووووول





آبن فهم ال عبدان

[vip]

السلام عليكم ورحمة الله وبركاته

بيض الله وجهك يا بن فهم على السيره والقصائد

محمد السديري(رحمه الله)شاعر غني عن التعريف

قصائد في قمة الروعة والجزالة

لم يسعفني الوقت لاكمالها

لي عوده باذن الله

تقديري

[أبن وندهـ]

ارررررحب ياابن فهم ال عبدان
مشكووور على الطرح
تقديري،،،

[الصــقر]

مشكووووور على الموضوع الجميل

تــــــــــــــــــــــقديري لك ,,,

[هداج العاطفي]

اررررررررررررررحب يابن فهم تراحيب المطر ومشكور على الطرح

ولاهنت ورايتك بيضا



تقبل مروري

[وآثق آلخٌطوُهـ]

لاهنت على المرور العذب و الجميل
تقديري لشخصك الكريم
اخوك آبن فهم

[المسعودي]

السلام عليكم ورحمة الله وبركاته

مشكور على الطرح المميز

دمت بود

[سراب]

لاهنت ع الديوان طال عمرك

[السيف الصقيل]

مشكور على الطرح المميز

دمت بود

[منيف العاطفـي]

هـلا وغــلا


مشكـــور على الطـــرح المميـــــــز



يعطيـــك العــافيــــه



تحيااااااتي

[ذيب الغداري]

السلام عليكم ورحمة الله وبركاته

يعطيك الف عافيه

http://alfaris.net/up/36/alfaris_net_1247967668.gif (http://alfaris.net/up/v.php?p=36/alfaris_net_1247967668.gif)

تقديري ,,

[ناصر بن لمدان]

اااااررحب ياااابوعشق وبيض االله وجهك على مجهودك المميز

ولك الشكر الجزيل على كنز الثقاااافه المتوااجد عندك
وااالله يرحم السديري

تحيااتي لك,,,,

[وآثق آلخٌطوُهـ]

ارررررررررررحبو تراحيب المطر

ولاهنتو على المرور الرائع والمميز

تقديري للجميع