ماهوالواجب علينا بعد وفاة إنسان عزيز علينا (الصديق) (اخر مشاركة : صعيب بن عبدالله - عددالردود : 0 - عددالزوار : 515 )           »          (مقهى الأدباء) (اخر مشاركة : محمد بن فهد - عددالردود : 744 - عددالزوار : 28784 )           »          ليتك معي يا سلامه (اخر مشاركة : عبدالله المشعلي - عددالردود : 0 - عددالزوار : 4206 )           »          اختلطت الدماء (اخر مشاركة : سنان المصطفى - عددالردود : 0 - عددالزوار : 5038 )           »          ***عندما يهمس الســـــــــــــراب*** (اخر مشاركة : سراب - عددالردود : 3263 - عددالزوار : 108160 )           »          عبر عن شعووووورك (اخر مشاركة : سراب - عددالردود : 13530 - عددالزوار : 175156 )           »          اذا ودك تقول شيء تعال وقول اللي ودك (اخر مشاركة : سراب - عددالردود : 51444 - عددالزوار : 432766 )           »          الرجاء الدخول للأهمية (اخر مشاركة : أبو مهند العاطفي - عددالردود : 0 - عددالزوار : 6 )           »          دفتر الحضور اليومى للاعضاء!! ((سجل الحضور والغياب)) (اخر مشاركة : منيف العاطفـي - عددالردود : 6033 - عددالزوار : 103051 )           »          السلام (اخر مشاركة : سراب - عددالردود : 2 - عددالزوار : 17 )           »         



قســم مدونات الأعضاء . دوّن مقالاتك و أفكارك و مجريات حياتك بكل حرية....

الإهداءات

إضافة رد
 
أدوات الموضوع انواع عرض الموضوع
قديم 06-07-2010, 04:17 PM   #1
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي الشاعر الراقي ،/ مشبب عشق العاطفي ( مدونه خاصه بالشاعر )


أســعــد الله جميـع أوقاتــكــم بكل خــيــر
احبتي اعضاء منتديات ال عاطف
يسرني ان اقدم لكم كل مايخص

شاعر الجزاله والعذوبه
مشبب بن عشق بن فهم العاطفي


نشأته
ولد في غرة صفر من عام 1400هـ في روح بلاد قحطان الرين
وبالتحديد الرين القديم نشأ وترعرع شاعرنا بين اخواله الخنافر
وابناء عمومته ال سعيدان ال عاطف وقضى مايقارب 16 عاماً في تلك البلاد حيث تخرج من مدرسة سعيد بن المسيب الابتدائيه والمتوسطه وكان متفوقاً في دراسته وبعد أنتقاله لمحافظة المزاحميه حصل على الشهاده الثانويه العامه وكان ترتيبه الاول على مستوى مدارس المنطقه في ذلك العام 1418هـ حيث كانت نسبته النهائيه 94%
حصل على بكالريوس اللغة العربيه من كلية إعداد المعلمين بالرياض وذلك عام1425هـ بتقدير جيد جداً . يتعين بعد ذلك معلمٍ وهو حالياً على رأس العمل في مدرسة عبدالله بن سلام الابتدائيه بجو







التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 11:15 AM.
  رد مع اقتباس
قديم 06-07-2010, 04:23 PM   #2
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي




في البداية كان السؤال عن بطاقته الشخصية

الاسم رباعي مشبب بن عشق بن فهم ال عبدان العاطفي

العمر/ 30 عام

الوظيفة / معلم

الحالة الاجتماعية / أعزب

مكان الإقامة / المزاحميه

الشهادة العلمية التي حصلت عليها / بكالريوس لغة عربيه كلية المعلمين

الهواية /السفر


الرياضة المحببة /كرة القدم

النادي المفضل لديك / الهلال

أين تقضي وقت فراغك /الاستراحه



هل الأنترنت قلل من أهمية الكتاب /مستحيل

وماهو آخر كتاب قراءته / موعد مع الحياة للدكتور خالد المنيف وانصح الشباب بقراءته

ماهي نوعية الكتب التي تستهويك /التاريخيه خصوصاً كتب السلف


مدينة سعودية ترتاح فيها غير مكة والمدينة / الخبر

مدينة خارج السعودية سافرت لها ونالت على اعجابك /بيروت

مدينة خارج السعودية ترغب السفر إليها /لايوجد

مجلة شعريةتحرص على تصفحها /لايوجد



جريدة يومية تحرص على تصفحها/الجزيرة



قناة شعرية تحرص على مشاهدتها /الساحه والصحراء



القناة أو القنوات المحببه إليك /متابع وبجنون قناة البوادي



برنامج تلفزيوني تحرص على متابعته /من سيربح المليون على mbc



أمنية ترى أنها لن تحقق/ أن أعيش في بغداد بقرب دجلة والفرات في عهد ابوجعفر المنصور



حدثنا عن هوايتك /السفر متعه لكن تختلف المفاهيم وأسباب السفر وبالنسبة لي سافرت كثير ولكن لدول عربيه فقط حيث قمت

بزيارة 11 دولةعربيه وفي كل دوله فيها ذكريات .

هل لك ذكريات مع هوايتك /كثيره لكن فيه موقف ، قبل خمس سنوات كنا ثلاثه مسافرين وكنا راكبين التلفريك

طبعاً فيه تلفريك رايح وتلفريك جاي وأنا اسولف مع الربع مادريت إلا علبه كولا وقعت في راسي ويوم التفت إلا هذا واحد راكب

التلفريك الجاي من أهل المزاحميه متهاوش معه قبل أسافر ويرفع صوته ويقول


(ياقحطاني ناشب لي حتى في لبنان)

المهم ياطويل العمر نزلنا من التلفريك وهم نزلوا بعد وصرنا كلنا في الساحه وأنا واللي معي انطلقنا عليه وقبل نوصله قام يصيح ،

تكفى ياقحطاني تراني في وجهك من اخوياك وعقبها انتهينا وصار حب خشوم


:::: الجانب الشعري ::::

تاريخ بدايتك الشعرية : 1416هـ

هل الشعر لديك موهبه أم وراثة :أتوقع موهبه

من أكتشف شاعريتك : لايوجد

ماهي أول قصيدة نشرت لك : وفي أي منبر إعلامي إذاعة ، قناة ، مجلة ، في جريدة : مجلة اليمامه عام1421هـ وأذكر منها البيت

الاول وكانت لها مناسبه حيث كنت في قاعة المحاضرات بأول سنه في الكلية .


دكتور ياللي تشرح الدرس وشفيك
ماشلت هم اللي همومه تشيله

دكتور انا في الحرب مانيب ناصيك
مير اتسلى يوم شعري وسيله


أول قصيدة كتبتها ماهي مناسبتها واذا تحفظ منها شيء عطناه الله لا يهينك يابو عشق:

لاأذكر

هل تحفظ قصائدك ؟

عدم حفظي لقصائدي أمر يزعجني وهذا بحد ذاته مشكله كبيرة تحطك في مواقف لاتحسد عليها

مناسبة تمنيت لو أنك كتبت فيها قصيدة :

طافت علي فزعة ابوفيصل للشيخ جابر حيث السن كان صغير

بيت تردده دائماً :

خلوني أسج عن موضوعه احسنلي
ولا الغلا والله ان يبطي وهو غالي

قصيدة لك تعتبرها قريبة منك جداً:

هي أربعه دائماً أرددها

لولا الشعر ما صرت في ذا الزمن حي
ولو لا الأمل ما صرت شاعر عصامي

ولولا التحدي ماتحملته الكي
ولاعاش راسٍ في الحياة انهزامي

والشوق والهوجاس والهم والغي
أربع مع أربع ماتنقص مقامي

وأشياء في نفسي وتفسيرها شي
والتسمية صعبه بوقت الاسامي

ماهو الغرض الشعري الذي تكتب عليه دائماً : والكثير يرأك تكتب الغزل بشكل كبير هل أنت تؤمن بمقولة بعض الشعراء

( بأن الشعر الغزلي هو الذي يفرض استمراره )في الساحة الشعرية :

أخوي ابوغاده انت شاعر ولا تخفاك الامورالغزل انا أرى من وجهة نظري

هوالغرض الوحيد الذي يجبرك على ابتكار الفكره والصوره والوصف في آن واحد . مثلا أذا أردت ان تمدح لك شخص وتجد انك

مسبوق على الفكرة التي تريد أن تطرحها ايضاً في الرثاء وكذلك في النصحوالحكمه وهذه وجة نظر وليست قاعده جميع ماذكرت لك

جانب والجانب الثاني اذا صرت تكتب من قلب هذه حالة كفيله بإنك تطرق هذا المجال (الغزل)


ماذا يعاب على بعض الشعراء الحالين ؟

الحمدلله شعراءنا مبدعين ومافيهم كلام بس المشكلة يابوغاده في التخصص الأكاديمي في الشعر وهذا مو ذنبهم ولاهوب شرط الواحد

يتعمق في أمور الشعر بعطيك أمثله :

1- البحر المسحوب لايقبل ابداً البحر الهلالي ومع ذلك نجد شعراء والمشكله كبار تجده يكتب على المسحوب وبنفس الوقت هلالي)

أي يهل شطر الصدر(وأعترف لك أنا شخصياً بعد ما لاحظت هذا الشيء ومن شعار كبار سويت مثلهم والشكوى على الله .

على الرغم كلنا يعرف إنالبحر الهلالي له طرقه الخاص .

2- أيضاً أعطيك مثال ثاني

قافيتك في البيت الأول ( صبرك )

وقافيتك في البيت الثاني ( حبرك )


إذن خلاص لازم الشاعر في هالحاله يجبرنفسه على قافية ( ثلاثة حروف)مدامه بنا ولكنك تتفاجأ بقافيته في البيت الثالث

(صدرك ) هنا تقيد بالحرفين الاخيرة فقط ولم يتقيد بالحرف الباء الذي قبلها


تحدث عن الشاعرية :

ابوغاده الشعر مهوب وزن وقافيه وقوة لفظ وجزالة فقط تبقى الشاعريه مطلوبه وبتسألني وشلون تميز الشاعريه من النظم

بعطيك شطرين وانت شاعر وبتميز الشاعريه من النظم

1-لك عيونٍ تناظرني وتقتلني وتحييني

2-عيونك تكتم انفاسي وتقتلني وتحييني

تجد في الشطرالاول نظم وصف كلام لك عيون(أكيد له عيون اجل وشهو )

وتناظرني ( اكيد العيون تناظر )يعني صف كلام .

لكن الشطر الثاني فيه الشاعريه ( ربط كاف المخاطبه بالعيون ) ومن بعدها ردة فعل الشاعر في هذه الحاله ( كتم انفاسه ) وبعدها

حرف العطف الواو تقتلني ويتحييني وان شالله إن الصوره وضحت

آخر قصيدة غزلية كتبتها :


تبكي عيونك لاتخيلت فرقاي
وتقول حبي وش حياتك بدونه

ماتدري انك حلم عمري ودنياي
لوأفقدك يفقد مشبب عيونه

يالماضي الحاضر وابي حبك الجاي
يكبر ويكبر والبشر يذكرونه

أن قلت لي أبشر ويازين ذا الراي
بقول تكفى خلهم يسمعونه

ناسٍ تحاربني وتنعت مزاياي
إن الولد هذا تزايد جنونه

والله لواصل واقهر بحبك عداي
مدام قلبي وسط قلب(ن) يصونه

وتأكد إنك لو تخيلت فرقاي
يعني غرامك صادقات(ن) مزونه



آخر قصيدة كتبتها حتى هذه اللحظة :

آخر ماكتبت ابيات وارسلتها لخوي فهد

أبشر بعزك دامني حي ياخوك
أقولها صادق ولا ابغى طماعه

واللي تجرى يجلب لدربه الشوك
أقص راسه لو يطول ارتفاعه

قلة ترى ماكل مشروك مبروك
الجد واحد بس غير الجماعه

ياقلبي الظميان والناس عادوك
أبشر مدام الورث ورث الشجاعه

أنا أدري إن الشعر ماهوب مملوك
لكن غني" به وغيري مجاعه



آخر رسالة شعرية وصلت لجوالك :

لايوجد

ماهي الأمسيات اللي أحييتها يابو عشق :

كثير يابوغادة .

وماهي من وجهة نظرك افضل امسية :

كانت في المزاحمية قبل اربع سنوات وكان معي الشاعر سالم بن سحمان السبيعي

وعبدالله الاكلبي والاعلامي سعد الثنيان

(عضو لجنة التحكيم في برنامج شاعر الوطن )

هل هناك طقس معين تحب الكتابة فيه ولا القصيدة متى ما جات فرغت نفسك لها :

بلا شك متى ماجات فرضت نفسها علي

رأيك في شعر الحداثة :

أوافق عملاق الشعر الشاعر ناصر بن لمدان فعلا التحديث يكون في المفردة فقط ولايصل لدرجة المبالغة وعلى الرغم من ذلك فإن له

جمهوره والذي يؤسفني أن هذا المفهوم دارج وهوغير ذلك فالحداثه غير والتحديث غير .

لاني الحداثه مصطلح عربي ولا أود الخوض في أمور تاريخيه يطول الحديث عنها ولسنا في مجال أن نتطرق لشعراء المهجر

ومدرسة أبولو وأمور تدوخ الراس يابوغادة


قرأت لك قصيدة بالفصحى وأرى أنك مبدع ومتألق : هل لك محاولات أكثر في هذا الجانب وياليت تضيفها لنا :



يشهد الله كثير يابوغاده لكن ماأذكر منها شي الا هذي وهي ومجاراة للشاعرمحمد بن فطيس المري

ياسارق(ن) قلب اليتيم ولمتعد
أنسيت أن العمر في نقصاني ؟

أنت الذي أقسمت أن الحب لي
وعشقتني والعشق منك أتاني

أسقيتني ماء الغرام ولم أكن
وقتاً مضى متعطشاُ ظمآني

والآن لم يخطر ل بالك أنني
أدمنت بل أدمنته الإدماني

منك الحياة وخالقيأحببتها
وشعرت أن الدهر لن يعصاني

لم أشتكي للفرقدين مصائبي
ليلاً وليس لأنني قحطاني

بل كنت نور الدرب يامن بعتني
وتركتني متشوق السلواني

والآن ياللهول منك نسيتني
هل تقبل الأحلام أن تنساني



ماهي اصعب قافية كتبت عليها يابو عشق وترى انك استهلكت جميع مفرداتها :

ابوغادة بكون صريح معك الجزئيه هذي آخر اهتماماتي فأنا لست أستعرض

قواي الشعريه من ناحية التعجيزبالقافيه وأنما أكتب مايجول في خاطري فالشعر من الشعور كذلك احاول وبقدر الامكان أن ألامس أكبر

شريحه من متذوقين الشعر اكتب قصيدة على ( الي وشطرها الثاني يها)وتلامس

الناس أبرك من تعقيد وتصعيب القافيه التي قدتؤدي الى تفكك القصيدة وضعفها وفقدها للبلاغه والجزاله والسبب انشغالي بالقافيه

كان في الماضي للشعر برامج على الإذاعة بعد ذلك المجلات ثم المنتديات والقنوات

هل تعدد المصادر خدمت الشعر أم أتاحت فرصة للجميع



كلا الحالتين

ماهو سبب ابتعادك عن الآعلام : هل القصور منك أممنهم هم

الظلم شين ورغم الشلليه الواضحه في الساحه إلا ان التقصير مني أنا شخصياً

وماهو الأمر الذي يزعجك في الوسط الشعري :

مثل ماذكرت الشلليه

الشعراء والمنتديات من يخدم الآخر :

كلاهما مكمل للثاني

المجلات الشعرية اصبح مستواها راكد تقريباً هل كثرة المنتديات أثرت على متابعتها :


ركود المجلات شي طبيعي بعد القنوات والمنتديات وخصوص اًالمنتديات


وهل سبق لك ان نشر لك في مجلة شعرية : أو صحيفة يومية : وياليت تعطينا القصيدة اذا فيه يابو عشق


نعم اليمامه وفواصل والمختلف


والقصيدة التي نشرتها في فواصل



عديت انا من فوق ابانات والنير
وجريت صوتي يوم كل(ن) تخلىّ

يابوبدر وش صار وش عاد بيصير
الوقت قاسي والوليف يتغلىّ

دموع عيني يارفيقي نوافير
وحجاج غيري من سروره تعلىّ

مرات اقول ان البلا في الغنادير
ومدري اناياخوك غلطان ولىّ

ومرات اقول إنها ظروف ومقادير
وكم مرةٍ جيته ورحّب وهلىّ

احترت في حالي ومحتاج تفسير
وشرواك هرجه يالخوي مايملىّ

ماني السديري وادري ان منته عمير
ولاشك ماقلنا القصيد نتسلىّ

هذي علومي ياحفيد المناعير
عايش بغدرا..... والضيا ماتجلىّ


هل هناك شخصية شعرية تأثر بها مشبب بن عشق :

لدرجة الجنون تأثرت بمتعب التركي

رأيك في المسابقات الشعرية وماهي افضل مسابقة من وجهة نظرك :

انا ضد المسابقات جملةٍ وتفصيل ومن وجهة نظري افضل مسابقة شاعر العرب الاخيرة لانها بدون تصويت كذلك مسابقة

شاعرالنخبه في منتدى ال عاطف التي تشرفت وشاركت فيها لانها مهما كان تحمل اسم القبيلةوهذا اقل شي نقدمه لهذا الاسم

هل سبق وان شاركت في مسابقة شعرية في القنوات : وماهو رأيك فيها وماهو افضلها من وجهة نظرك :

لا كلها تعتمد على المادة ولم ولن افكر بالمشاركه في اي مسابقة الا اذ كانت المسابقة بدون تصويت

هل تؤيد مشاركة الشعراء المشهورين مثل بن جدلان وبن وسام وبن عونوغيرهم في مثل هذه المسابقات :


لا أويد إطلاقاً


لوكنت مسوؤل عن مسابقة شعرية وطلب منك تحديد 6 شخصيات كلجنة تحكيم من سوف تختار كوجهة نظر خاصه فيك :


سلطان الهاجري بن جدلان بن عون جزاء بن صالح الحربي بدر الحويفي الدكتور شالح بن خريزان


هل المهرجانات السياحية في المملكة أعطت الشعر النبطي حقه أم هناك تقصيرمن بعض الجهات من وجهة نظرك :


في الصيف والاعياد تجدها بكثرة و للاسف مجرد ماتنتهي هذه الفترة تنتهي المهرجانات


قدمت لك دعوة بالمشاركةفي مهرجان ( المزاحمية ) وانت كفو وتستاااهل يابو عشق والثقة فيك كبيرة دائماً : ماهو شعورك وانت

من ضمن كوكبة من الشعراء الذين يعايدون الوطن بقصائدهم :

شعور بالفخر وداعم معنوي بدون شك

هل هذه المشاركة الأولى لكفي المهرجان : اذا كانت الأولى فلماذ تم تأخير إختيارك وانت شاعر من أبناء المنطقة :


نعم هي اول مره وبصراحه يابوغادة لم انشر قصائدي إلا من سنة تقريباً

وكانت توجه لي دعوات وارفض لاسباب شخصيه لكن هذه السنه ضغوطات من ناس غالين وماتوقعت تدخلهم في هالامور .

يعاني الشعراء من الدعوات التي لا يستطيعون رفضها من قبل اصحاب الزواجات

هل حضورها يضيف للشاعر أم مجرد إجابة دعوة فقط لا غير :

الجزء الثاني اذا تبي الصراحه

لو كنت مختص بالتنسيق مع الشعراء لإحياء أمسية نظم معينة وطلب منك أختيار 6 شعراء من يقع عليه إختيارك من الشعراء الحالين في الساحة

الشعرية :

ابن فطيس سعد علوش فهد المساعد مهدي ال حيدر محمد بن المريبد بندر المحيا

ما هو رأيك في نشر القصايد عن طريق اليوتيوب والبلوتوث :

جيدة تساعد على الانتشار نوعاً ما واعرف لك اسماءمشهوره كانت بدايتها عن طريق اليوتيوب والبلوتوث

من من شعراء المحاورة تفضل الاستماع إليه:

بن شايق وحبيب العازمي

هل لك محاولات في شعر المحاورة : واذا كان هناك محاولات اذكر منها ابيات ومن هم الشعراءالذين قابلتهم :

لاولله ماقابلت ولاتطرقت للمحاوره

من من شعراء النظم تفضل الاستماع إليه :

ابن فطيس وسعد علوش رغم الاختلاف بينهم

سلطان الهاجري وسعد بن جدلان ومحمد بن فطيس وضيدان بن قضعان ترتيبهم من وجهة نظرك ولا تكون الإجابة دبلوماسية تقول كلهم شعراء

ويستاهلون الأول :

ابن فطيس ضيدان الهاجري ابن جدلان

ويالربع تراها وجهة نظر وحسب الذائقه والله يهديك يابوغاده على ذا السؤال

أنتشرت الدواوين المقروءة والمسموعة في الآونة الأخيرة من نال أعجابك من هذه الدواوين :


لم اتابع ولاديوان لا صوتي ولا مقروء


هناك دواوين صوتية لم تحقق ارباح لشركات النشر :


يا إما ملل أو نوعية المادة


هل لك مشاركات في دواوين صوتية أو لك نية لإصدار ديوان شعري مقروء أو مسموع


:نعم لي مشاركه بديوان صوتي يتعلق بمسابقه شاعر النخبه ومعي بعض الزملاء وان شاء يطلع للنور

هل الظهور من خلال المنتديات كافي ليصل الشاعر للجمهور :

صدقني يابوغاده للمنتديات الشعرية جمهور ماتتخيله وربما بل انا متاكد يفوق جماهيرته القنوات الشعريه وبتسالني ليش ؟ المنتديات

الشعريه مايدخلها الا متذوق للشعر اماالقنوات الشعريه يشوفها المتذوق وغيره من الناس .

وانا شخصياً ارتاح اذا لقيت قصيدتي معلق عليها احد المتذوقين ومقتبس بيت اوبيتين ابرك لي من قناة يمكن لو اطلع فيها والريموت

معك تغير الموجه على قناة ثانية

قصائدك بالرغم من قصرها الا انها مميزة وتستوجب علينا الوقوف لهااحترام وتقدير هل هذا ايمان بمقولة ( خير الكلام ما قل ودل )

علماً بأنىا اغلب قصائد العلم بن جدلان لا تتعدى 10 ابيات :


والشعر طوله وقصـره مايفيـد
كان مايحمـل معانـي محكمـات

مايفيد الطول عسبـان الجريـد
وحربة الشلفاتجي عشر قفلات

والهلل مهما كثر ماهـورصيـد
الذهب يفـرق عليـه بكـل ذات

مايعيش الا الثمين من القصيـد
عند عشاق المعانـي والـروات

للشاعر / بدر الحويفي = ..

يلاحظ عليك يابوعشق انك تكتب دايماً على بحر المسحوب

صحيح لان البحر هذا قريب مني وأجد نفسي فيه على الرغم أني كتبت على الهجيني يأنواعه الطويل والقصير وكتبت على المنكوس والحداء والصخري

والفريسني والشيباني وعلى فكره لو ترجع لقصايد شالح بن هدلان ومحمد بن هادي وبركات الشريف وراكان بن حثلين تجدهااغلبها مسحوب


القنوات الشعرية في زيادة كبيرة و تبث على مدار 24ساعة تقدم من خلالها شعراء بالعشرات هل نسبة الجزل من القصيد المطروح نسبة مقبولةأم هناك

عدد كبير من القصائد التي تذاع بمستوى شاعرية قليل :


عدد كبير من القصائد تذاع بمستوى شاعرية قليل

هل عرضت لكقصيدة ( عرض خاص) على أي قناة :

لا

بعطيك بعض الكلمات وأكتب اسم الشاعر أو الشعراء المناسبين لهذه الكلمات :


شاعر جمع النظم والمحاورة : سلطان الهاجري

2: شاعر نظم من الدرجة الأولى :بن فطيس

3: شاعر يعتبر فقيده على الشعر : الامير سعود بن بندر رحمة الله

4: شاعر الجزالة : بن جدلان

5: شاعر الفكرة الجديدة : سعدعلوش

6: شاعر الحكمة :صقر النصافي

7: شاعرقادم بقوة وترى انه المميز بين جيله : فهد المساعد

8 : شاعر يكتب الغزل مع احترام ذائقة المتلقي : متعب التركي

9 : شاعر تمنى ان يعود للساحة الشعرية :متعب التركي


10: شاعر من وجهة نظرك لم يأخذ حقه أعلامياً : الشاعر الكبير محمد بن شايق

شاركت في مسابقة شاعر النخبة وصلت للمرحلة الآخيرة : ماهو رأيك في المسابقة بشكلعام وهل كانت اصداء مشاركاتك مرضية بالنسبة لك عند

جمهورك :

سبق وان جاوبت علي هذا السؤال وابشرك جملنا وتجملنا

كيف عشت تفاصيل فترة المسابقة :

أخبرني اخوي فهد بالمسابقه وكنت مترددوقلت له طب وتخير من القصيد واختار القصيدة الاولى والحمد لله تجاوزت المرحله بعدهاسافرت طال عمرك

برى المملكة لمدة شهر وكنت ارسل لبوعشق وو اللي يعطيني العلوم اول باول حتى والله الانترنت ماعرف اكتب حرف وانت عارف ذا الشي يابوغاده

الين رجعت وتحدد موعد الحفل اللي كلنا نذكره


هل المسابقة كانت جسر عبور للجمهور امكان هناك نقطة قبل المسابقة تلاقيت فيها معهم :

لاقبل كان فيه نقاط من عدة جوانب اهمها المناسبات التعليميه ومناسبات القبيلة ( ال عبدان ) بالذات

قصيدة حصرية لم تنشر من قبل ويعتبر وجودها هنا في هذا الموضوع أول ظهورلها :


احترت انا مابين هذا وذيه
وصفو علي عدوان جيشي طوابير

وياخوفتي لو شكلها مسرحيه
تمشي علي ياناس من دون تصوير

واليوم انا مانيب ذابح مطيه
عشان ماترجع قصص سالم الزير

بس الحميه لعنبوها الحميه
لعيون خلي نصنع الحلم ويصير


ماهي القصيدة التي ترى انها أوصلتك للجمهور :

ان شالله ان القصايد كلها تجمل


هل ترد ( بصح الله لسانك وبيض الله وجهك على القصيدة ) على بعض القصائد التي تكون دون المستوى :


نعم

منتدى آل عاطف ومدى خدمته للقبيلة :

لاأبالغ بأن منتدى ال عاطف اصبح نموذج رائع يقتدى به لخدمة القبيله وهذا بفضل الله ثم بفضل الجميع وتكاتفهم سواءً

شيوخنا أو إدرتنا أو مشرفينا أومراقبينا وأعضاءنا وأسال الله العلي القدير أن يسخر هذا المنتدى لخدمة الدين والوطن والقبيله وأن تعم الفائده في جميع

المجالات


:::: المساحة الحرة ::::


أعضاء منتديات آل عاطف :

أحب اقولهم إن هذا المنتدى يفتخر فيهم وفيما يطرحونه من مشاركات والله يديم المحبه بين الجميع

مشرفين ومراقبين منتديات آل عاطف :

أشكرهم شكر خاص حيث أنهم كونوا شبكة رائعه من التعارف بين أبناء القبيله ومن زار هذا المنتدى يحس بالراحه وإنه بين أخوانه

أخوانك أعضاءالإدارة :

الله يبيض وجيهم على كل حال والله يعطيهم العافيه على جهودهم الجباره في خدمة هذا المنتدى

وكلهم على مستوى عالي من الثقافه والمعرفه

كلمة آخيرة يابو عشق :

أتمنى إني كنت خفيف الظل عليك وعلى المتابعين
















التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 12:48 PM.
  رد مع اقتباس
قديم 06-07-2010, 04:26 PM   #3
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

ضيف كرسي الاعتراف الشاعر : مشبب عشق العاطفي






مســــاء معـــطر بروح الصـــــفاء ..

تتــــــلألأ فــــيه نجـــــــوم السمـــــــاء ..

وتتــــهاتــــف نســــــماتـــه بالأخـــــــــــاء ..

مســــــاء زهرا ينثـــر في ( منتديات ال عـــــــــــــــاطــــــــــــــــف ) شـــذاه ..

تحيــــة معـــــــــــطرة بالــــــحــــب

والـــــسخـــــــــاء ..

احبتي :

ضيفنا لهذا الإسبوع شخصية تتصف بالعطاء له دور بارز ومشرق في خدمة

الــشـــعـــر كان وما زال يتألق في طرحه لكل انواع الشعر ..

يدير مهام قيادة الشعر


يقول شاعرنـآ"



من يوم غاب وصادق الحب معـدوم
ولو ناض برق(ن) قلت وين السحابه

كل الجروح بكـوم ومفارقـه كـوم
عزي لقلب(ن) تجهل النـاس مابـه



شاعر يتصف بعدة صفات لو اكتبها لفتحة من اجله صفحات

شاعر رسم لوحة في سماء شعر النظم وهي لوحة الابداع والتالق

الشاعر المتالق مشبب بن عشق

اين الشاعر مشبب بن عشق من الاعلام وهل القصور منهم ام رغبه منك

مرحبا يابوعدي والله لايهينك على الترحيب وهذا من طيبك بالنسبه للإعلام

موجود لكن بشكل محدود والقصور قد يكون مني أنا .

هل تعتقد ان وسامتك سبب شهرتك؟

أول شي منيب مشهور ولاوصلت لعالم الشهره من وجهة نظري

وثاني شي الجمال جمال الروح طال عمرك


هل من الممكن ان نسمع قصايدك بصوتك عن طريق ديوان صوتي لك وهل هناك تعاون بينك وبين المنشدين

بالنسبه لهذا السؤال يشهد الله منذ فتره وليست بالقصيره طلب مني هذا الشي من قبل اشخاص عزيزين علي

ولكني رفضت لقناعتي الشخصيه وتفاجأت بعدها بوجودبعض قصائدي منزله في اليوتيوب وبهذه المناسبه انا اشكرهم جزيل الشكر

وبالنسبه للتعاون مع المنشدين انشالله عن قريب وان كاني بتعاون مع احد المنشدين في ذمتي الذمه ولا أجامل أن

الشاعر فيصل بن سابر هو المبدى ويشرفني ذلك لكن عطوني شوية وقت وافضى له .


مشبب بن عشق في سطور بعيد عن الشعر

مشبب بن عشق بن فهم العاطفي القحطاني أبلغ من العمر 30 سنه

المؤهل بكالريوس لغه عربيه - أعمل معلم- هلالي حتى النخاع:d

أعشق قراءة الشعر أكثر من كتابته -وأعشق السفر خاصةٍ في الصيف

الشاعر الكبير غيث بن سالم ال عبدان ال عاطف من كبار شعراء ال عاطف وقحطان

وارى تقصير من ناحيتنا جميع في حقه اقصد من ناحية نشر قصايده لانها تعتبر كنز ويستحق منا

ان ننشر قصايده في منتدى ربعه ال عاطف

وبما انك نقرب له لماذا لم يتم التواصل معه ونشر قصايده

الشاعر الكبير غيث بن سالم قبل ان يكون شاعر فهو في مكانة والدي رحمه الله

واكن له التقدير والاحترام وكلامك في محله والتقصير منا جميعاً من الراس للعرقوب

في حق هذا الشاعر العلم والله يطول في عمره وعن قريب سترى قصائده متصدره في هذا المنتدى الشامخ .


هل تعيش قصة حب؟ وماذا قلت في الحبيب؟

كنت في السابق اعيشها والحين لاوالله

واقول له مثل ماقال الشاعر :


تدري وش آخر حاجةٍ قلتها عنك
اللــــــه يذكر ذاك الانسان بالخير


حكمتك في الحياه ؟

خلك شمالي عند زلة قرايبك
وعلى الحقوق اليا نصنك احجازي

للشاعر الكبير ابن زويبن

اخر قصيده بيت منها لاهنت ؟؟

ولا يا زماني شفني بديرتي هالك
أداوي الجروح و ناسها ماتداويني


بما انك عشت يتيم كيف طلعت بهالرجوله ؟

سؤالك هذا فضفاض لكن بختصرها واقولك

انا اليتيم اللي عشق كل نوماس
يمشي على نهج الرجال الحكيمه


هل المعاناة سبب كل ابداع في الحياة؟

قصائد ابن زيدون في سجن الاندلس وقصائد محمد سعيد البارودي في المنفى وقصائد ابن لعبون اكبر دليل على ان الحرمان والمعاناة

ركيزه من ركائز الابداع


بديات مشبب الفعليه

بدايتي في الشعر عام 1416هـ وبدايتي في النشر 1420 ه اول قصيده نشرت لي في مجلة اليمامه

مارائيك في الساحه الشعريه اليوم وماالسبيات التي تواجه الساحه رائيك ؟

ممتازه من ناحية الانتشار السريع وجيده من ناحية جمال الشعر ولايقارن عصرنا هذا بعصر الثمانينات وماقبله

اما السلبيات فهي واضحه وضوح الشمس

الاولى المجامله المفرطه

الثانيه الشلليه التي صارت جليه وواضحه في قنواتنا الشعبيه فكل قناه تركز على شعراء القبيله التي ينتمي اليها صاحب القناه وغض

النظر عن جماليات الشعر .


ماهي الامتيازات التي يجيب ان يتحلابها الشاعر لكي يكون شاعر معنى؟

اهمها البحث عن الفكره الجديده غير المسبوقه وهذه الميزه من وجهة نظري هي اهم صفه يجب ان يتصف بها الشاعر الحقيقي

وايضاً يليها في الاهميه ان تكون كتابته تلامس اكبر شريحه من الناس فالشعر رساله وتكمن هذه الرساله في هذا الجانب


هناك قاعده تقول ان اصدق الشعر اكذبه وانا اقول ان اصدق الشعر اعذبه فما رائيك في مقوله الناس وما اقوله ؟

سؤالك هذا سؤال فلسفي ويذكرني ببيت شعر للشاعر فهد عافت الذي يقول :

أردى شعر شعر ٍ يجي في محله
وأعظم شعر شعر ٍ محله يجي فيه

وأعتقد أننا كشعراء أومتذوقين أونقاد لو نتمعن في هذا البيت لأجبنا على هذا التساؤل

عموماً كأبداع أرى ان أصدق الشعر أكذبه


هل تكتب الشعر على كل طاري ام انك تكتب القصيده اذا وجب كتابتها ؟

أذا وجب كتابتها وأحياناً يشهد الله نطرق الحوليات بدون ماندري حيث تكتب بيت وتسجله بجوالك ولاتكمله ألابعد سنه


في اي مواضيع الشعر يروق مشبب
فخر - مدح- رثاء- غزل - هجاء


ولا وحده من هذي بس أميل للوجدانيات الغزليه



شاعر تراه اسطوره الشعر؟

أراهن أذا أستمر على هذا الطرح عشر سنوات قادمه سيكون أسطورة الشعر

من وجهة نظري هما الشاعران محمد بن فطيس وفهد المساعد

ابيات من اخر قصيده لك

ألايازماني شفني بديرتي هالك
أداوي الجروح وناسها ماتداويني

تغرك سواليفي وضحكي تهيالك
وأنا والله أني طاعن القلب بيديني

ولايازمن بالله وش عاد في بالك
دخيلك ترى اللي في ضميري مكفيني


أبيات تمنيت انها لك .؟؟؟؟؟؟؟؟؟؟؟؟؟؟؟؟؟

علميني يالقصايد هو خطاء ولاصواب
لارفضت انسى عيون ٍ عشتها شعر وشعور

وش بقى يوم أكتشفت أن أخر الدرب السراب
والبحر دمع لسواحل هاجرت عنها الطيور

للشاعر فهد المساعد



متى نرى الشاعر مشبب بن عشق في شاعر المليون او شاعر العرب وغيرها من المسابقات ؟

ماتوقع وانا ضد المسابقات





















التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:15 PM.
  رد مع اقتباس
قديم 06-07-2010, 04:28 PM   #4
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي



قصيدة الشاعر مشبب بن عشق العاطفي احتفالات العيد بمحافظة المزاحمية





الليله الليله مع الشعر ميعاد=وماغير هذا اليوم يوم ٍ بحاتيه
الشعر له جمهور واعي ونقّاد=يبقى رساله والذهب في معانيه
وأنا هنا واقف على روس الأشهاد=في ديرتي بكتب قصيدي وأغنيه
أرض الكرم وأرض الوفاء وأرض الأمجاد=تاريخها ياناس وشلون نحصيه
في حبها طوّعت حرفي ولافاد=تعجز حروفي بالغلا ماتوفيه
ياديرتي ياللّه عسى وقتك أعياد=يامزاحميه والغلا وين أوديه
إن جيت أحطك في الحشا حبك أزداد=وإن جيت أحطك فوق راسي ملكتيه
لله درك لا ولا مثلك بلاد=مجدك تليد وبالحضارة جمعتيه
يحميك رب الكون من كل حسّاد=وكم من حسودٍ خايباتٍ هقاويه
أهلك لهم صوتٍ كما صوت رعّاد=رجّالهم في المجد محدٍ يجاريه
ومحافظٍ واعي ونظراته بعاد=كفو ٍ لها والخير بانت مواريه
مستقبلك واعد وتاريخك إمداد=وحاضرك يااغلى دار كل ٍ حكى فيه
ياديرتي يالله عسى العيد ينعاد=وأشوف صرحك عالياتٍ مبانيه
يامزاحميه أرضك لقلبي أوتاد=وإن غبت عنك الدمع ينزل ويسقيه
حب الوطن فينا من عصور الاجداد=مال الدهر ولاّ اعتدل مانخليه
حكامنا آل سعود أسياد الأسياد=في ظل ابومتعب عسى الله يحميه
وسلطان ونايف والاحاسيس تنقاد=لبوفهد سلمان والله يعافيه
ياموطني حنا لك دروع وسناد=واللي نواك بشر تفشل مساعيه
حنا جنودك كانها حرب وجهاد=وأرواحنا فدوه وصوتك نلبيه
يقولها شاعر وله سلم وآجداد=قحطان جده والبلد تفتخر فيه






التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:27 PM.
  رد مع اقتباس
قديم 06-07-2010, 04:31 PM   #5
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

الشاعر مشبب بن عشق العاطفي قصيدة ترحيبيه في حفل زواج الشاب شبيب بن مران العاطفي










مرحبا باللي حضر من قريب ومن بعيد=ارحبو ثم ارحبو عد همال الغمام
ارحبو ترحيبةٍ ماتثمن بالقصيد=لونطقها شاعر ٍ طوع حروف الكلام
حفلنا زاد ابتهاجه وكن اليوم عيد=وإن توخرت بقصيدي تولجني ملام
سلمنا من عاد بقعا صبيه يستزيد=ارحبو ثم ارحبو في محل اهل المقام
في محل آلاد عبدان مزبان الوحيد=محزمي لا عودت للعزاوي والزحام
لابةٍ من نسل عاطف لهم باس ٍ شديد=من خلقها الله تضيم المعادي ماتضام
لابتي وافخر بهم والوفا فيني رصيد=عقب اللي دون ربعه تخشش في الظلام
بالنيابة قمت أرحب وأرددها واعيد=والجماله مطلبي دام في راسي عظام
ودامني من صلب عود ٍ كسب مجدٍ تليد=وغاب عني واصغر اخواني بسن الفطام
والله ان امشي على سكته واقنص واصيد=وابشروا يالابتي قسمكم راس السنام
واقنص الغالي ولا لد عيني للزهيد=تارك ٍ غيري يصيد الحجل عقب الحمام
ولاَ انا ماصيد غير المها علم ٍ وكيد=بسفل الوديان ولآ الوعد روس العدام
شاعر ٍ لاجبتها جبتها عقد ٍ فريد=وانحت الجلمود واسبح بحر وارمي سهام
بالشعر ذالليل نبغى نفيد ونستفيد=ونارد العد الرهاوي كما ورد الحيام
والمحافل مالها غير قصادٍ سديد=يطرب الجمهور ويجمل الربع الحشام
والمراجل طبعها ماتبي غمرن بليد=مطيب اللي لانصوه العرب رحب وقام
وانتهض بسلوم جده ولا عنها يحيد=وقدَم الرسلان والعود الازرق والطعام
وألف مبروكٍ يابوهادي العرس السعيد=يابن عمي دامت أفراحكم عام ٍ لعام
عرسكم عرس ٍ لنا والفرح ساق القصيد=لين نوخَ عندكم يارفيعين المقام
بالنيابة قمت أرحب وارددها واعيد=والجماله مطلبي دام في راسي عظام








التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:26 PM.
  رد مع اقتباس
قديم 06-07-2010, 04:32 PM   #6
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

قصيدة الشاعر مشبب بن عشق العاطفي في الشيخ طرجم بن سلامه بن سعيدان





الطاء ثم الراء والجيم والميم=اربع حروفٍ لو تشابك زعامه
سلام يانسل الشيوخ الشغاميم=من صلب هادي لين تاصل سلامه
امارةٍ ماجاتكم بالتعاميم=لاوالله إلا بالظفر والجهامه
شهادةٍ مني وانا بخير ومقيم=مير ابن عمك ماهنا له منامه
حلفت ممسي لين أصوغ المفاهيم=قصيدةٍ غير القصيد ونظامه
سلام ياطرجم وللشعر تكريم=واغلى القصايد ضمت أسمك علامه
قسمت شعري يابن عمي تقاسيم=وأبشرك ماقد ضعف بانقسامه
أرثي واقول النصح واشتاق واهيم=وامدح مثل شرواك واعرف مقامه
في الشعر اعلم ناس تحتاج تعليم=وشعيل لاذكوه قسمي سنامه
وأجاري فحول الشعر في المراسيم=ومن لااحترم ناسه يقل احترامه
ياشيخ وقفاتك يسولف بها الغيم=أستغفرالله كني أفهم كلامه
ياشوق من لاسلهمت كنَها الريم=بعيونها والثلج خلف اللثامه
طقت بالاصبع للرجال المقاديم=في بالها لامنصب ولا وسامه
قصيدةٍ سخرتها شطرها ميم=والشطر الاخر ودي اذكر سلامه
وختامها مني تحيه وتسليم=تنصاك ياطرجم ليوم القيامه






التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:29 PM.
  رد مع اقتباس
قديم 06-07-2010, 04:34 PM   #7
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

هذه قصيدة الشاعر مشبب بن عشق بن فهم العاطفي

في حفل الشاعر الكبير عبدالله بن شايق











سلام الله سلام(ن) يعجب الشعار والجمهور=سلام(ن) بمزجه بالنادرات وبصدق إلهامي
سلام(ن) يدهش النقاد في تصويره المحكور=سلام أطهر من الطاهر سلام اسمى من السامي
سلام أصدق من الديمه سلام(ن) زاد نوره نور=مع جيةٍ ضيوف(ن) كلبوهم ربع ٍ حشامي
سلامي عود(ن) أزرق عادته بين الرجال يدور=حرام إني لسوقه دامهم ذالليل قدامي
ولايامرحبا بعد السلام بربطها مجبور=ترى عيون الرجال حراب والشرهه على الرامي
صغير السن لكني على الطاله طويل شبور=أعصّب الراس وتنومس بربعي وكرّب حزامي
ولاياهاجسي جيت ومكانك بأول الطابور=تجمل لعنبو حيك تراها حامي بحامي
تجمل بالقصيد اللي شعاعه يقتل الديجور=وعلى الجمهور يصفق لي ويشرلي بالأبهامي
يقولون الشعر موقف وأنا أقول البخت له دور=ياكم من شاعر وقف وحظه طاح ماقامي
طرقت الشعر وأغراضه ثمان وغصت فيه بحور=عسى ربي يجملني وأحقق باقي احلامي
حضرت وجيت أبارك للرفيق الشاعر المشهور=عسى فرحة ولد شايق تواصل طول الأعوامي
لوادري مدح بن شايق يوفي هاجسي بسطور=مدحته مير انا عندي خبر بتجف الأقلامي
عساه يعيش متهني عسى عمره فرح وسرور=وعسى الله يرزقه ذريةٍ عن دينها تحامي
وبستاذن من الجمهور وبأعلنها ولاهي زور=ثلاث أبيات للي صار له عامين لوًامي
رساله عاجله ياللي عيونك في القصايد عور=نسيت أني ولد عاطف نسيت أن البحر طامي
ياعمي لاتعذر لي عذر كنه وعد بلفور=تحجج به يهود الغرب ضد رجال الأسلامي






التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:33 PM.
  رد مع اقتباس
قديم 06-07-2010, 11:34 PM   #8
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

الشاعر : مشبب عشق العاطفي



ياكم كتبنا من قصيد ونسيناه=مانبغي الشهره ولاكذب الاعلام
نكتب قصيد ولا خلصنا حذفناه=ولانحرق اوراقه ولانكسر اقلام
مانيب متخبي وربعي مسماه=في واجبي مانيب اعرف التلطام
ياصاح قلبي جاير الهم خاواه=ياكيف انام وصاحبي مابعد نام
في خاطري شي(ن) بقوله على آه=نبرة وجع واثر الوجع عقبه آلام
عزاه ياشعار ذالوقت عزاه=شعر(ن) على تصويت والنقد هدام
خمسة عشر عام(ن) وانا اقول ويلاه=يامجدنا اللي غاب خمسة عشر عام
قالوا حداثه واتفقنا قبلناه=ولاوعينا إلا الولد ضارب ٍ شام
مايدري إن أصل الحداثه درسناه=تصوير لكن كل شي(ن)له احكام
ليته يخلي السيل يجري بمجراه=مادام عشاقه تماثيل واصنام
شعر الجزاله يارفاقه فقدناه=والعين شابت من كثر عرض الافلام
وين القصيد المعتبر لاسمعناه=رقم(ن)صعيب وغاطس(ن)بين الارقام
وجهة نظر شاعر والابداع مغزاه=ومتخرج(ن) من مدرسة جور الايام






التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:35 PM.
  رد مع اقتباس
قديم 07-07-2010, 02:04 AM   #9
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

مساجله بين الشاعر : مشبب عشق العاطفي والدكتور شالح بن خريزان بن سفران

يقول مشبب في قصيدته


سر ياقلم وأكتب حسينات الأشعار=وعليك بالجزلات خل الهزالي
قصيدةٍ نادت لها بنت الأفكار=لذة حقايقها بطبخة خيالي
وقمت أتلفت فيهم يمين ويسار=وعينتهم ذربين في كل حالي
ناس لهم بالقلب حشمه ومقدار=ذولا عمام ٍ لي وذولا خوالي
واليوم أنا حددتها سر وجهار=وأرسلتها لشخص ٍ عزيز ٍ وغالي
هذاك شالح مكرم الضيف والجار=من لابتن تعلى على كل عالي
بين القبايل فازوا بردة الثار=ألأد ابن دراج نعــم العيالي
ياما قرينا في التواريخ وش صار=من فعلهم تهتز سود الجبالي
من وقعهم مطروح كبتن وطيار=وحنشل ثبور ٍ كلبوها هيالي
فرسان واصغرهم عقيد ومغوار=وعن جعمل العربان منيب سالي
وناصر وسلطان النعاره والاحرار=وجفين والنسيان ماهوب فالي
وأن جالذكر في ذيب وبعمه البار=أشوش وأنطل غترتي والعقالي
باالعون مافي صيتهم شك وغبار=والشمس تبقى لو غشاها الزوالي
خذيت لي مع سجة القاف مشوار=وكتبت من منظومها ماطرالي
وأرسلتها للي معه كل الاخبـار=في متنه نجوم زهت به ليالي
والطير لمن طار عشى هل الدار=والصيد في يمنىا كريم السبالي


رد الدكتور شالح بن خريزان بن سفران



يامرحبابك عد وبلات الأمطار=لأنشت من القبله حقوق الخيالي
الشعر يقطف مثل مقطوف الازهار=وانته قطفت من الزهر كل غالي
والشعر ينحت مثل منحوت الاحجار=والبعض ينقد مثل نقد الريالي
ياناسج الفكره كما عقد وسوار=في جيد عنقا مارمت باالدلالي
تلعب على الطاروق وزينات الأشعار=لاجرها الحداي خلف التوالي
يامشبب المنعور ياواف الاشبار=نسل الرجال موردين السلالي
جدك راعي العصلا اليا ثور غبار=يرسي كما ترسي خشوم الجبالي
له ماقف ٍ ماياقفه كل مغوار=يوم تربه سيفه يحل الجدالي
ترمي فلاها الخيل وتروح الاعمار=ويطير من زين البنات الجلالي
اليا اعتزا من فوق اصيلات الامهار=يطرح زعيم القوم ذيب العيالي
وابوك ذباح الغنم وقت الاعسار=كريم سبلا يوم شح الريالي
يوم القسى والجوع والوقت جوار=مايذبح الا الحيل ولاا الجمالي
ألاد ابن عاطف مديحين ألاذكار=هم درعنا لاصطك جال ٍ بجالي
اهل الوفا والعز والمجد والكار=واهل البيوت اللي بها كن وظلالي
دون الخوي والضيف والثالث الجار=ترخص حشاش الروح وجل الحلالي
ياطيبهم ياشرهم وقت الاشرار=مثل العسل في حال والمر حالي
لاصاح صياح الضحى والدبش ذار=تناوشوا عضب السيوف الطوالي
ثم انثنو من دون حسكات الأوبار=علط الرقاب مزوجات الرجالي
يامشبب ابوصيك في ذرب الاشوار=مهدي ولد عمك رفيق ٍ موالي
وباقي اخوانك مثل وصف الاحرار=شقر الاحرار اللي تروم العوالي
أجمع بني عمك وأشعم لها النار=واول مواري الطيب صفر الدلالي
والله فرض لامك حشمه ومقدار=ان كان طامع في القطوف الروالي
وختامها صلو على سيد الاخيار=واعداد ماهبت هبوب الشمالي











التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:39 PM.
  رد مع اقتباس
قديم 07-07-2010, 02:06 AM   #10
معلومات العضو
برونزي

الصورة الرمزية جريح الغربله
إحصائية العضو






حالة الاتصال والنقاط

الحالة : غير موجود
نقاطي :  139
آخر مواضيعي

 

الاوسمة والمراسله  


افتراضي

هذه مجاراة الشاعر مشبب بن عشق العاطفي لقصيدة شاعر العرب سلطان بن وسام الهاجري ( ياغبيش )


ياغبيش بن خليل سلم على عمير=بلغ سلامي لبن عمي وقله
يقولها سلطان شوق الغنادير=الشاعر اللي ماتغير محله
متميز(ن) من بين كل الشعاعير=وقت الهدد هو كاسب الصيد كله
بان اعتذاره للرجال المناعير=وانا اشهد انه مابدر منه زله
حبيت اجاريها وانا مقصدي غير=لوكان شعر الهاجري مانمله
الحب معميني وانا عادني صغير=ياوجد حالي لو كشفت الادله
تبكي معي ناس(ن) على حبها تغير=عشاق كلن يسرح بطيف خله
يادمعةٍ في ناظري دايم تحير=ولارمّشت صارت ديمةٍ مستهله
على وليف(ن) راح من غير تبرير=احرق زهر قلبي عقب مااستحله
خلوني ارحل واترك الحب واسير=حتى وانا المكسور دربي بدله
واليوم ياعشاق وش عاد بيصير=لاصار قلبك سلوته تستغله
ومهما حصل يابنت بذكرك بالخير=ويقطعك ياحب(ن) وراه المذله
وياللي تقول ان المحبه نواوير=اسمع جوابي وإن تضايقت خله
الحب عمره مايجي بالتباشير=الا مع خل ٍ على سنة الله






التوقيع

من بغى يمشي بجنبي لجل يوصل مستواي...

بلّغه خالص تحياتي وقله يستريح!!
آخر تعديل وآثق آلخٌطوُهـ يوم 28-09-2010 في 01:42 PM.
  رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:07 PM.

جميع مايطرح من مواضيع ومشاركات لا تعبر عن رأي إدارة المنتدى إنما تمثل صاحبها فقط

 


Powered by vBulletin® Copyright ©2000 - 2014, Jelsoft Enterprises Ltd. , TranZ By Almuhajir