(مقهى الأدباء) (اخر مشاركة : محمد بن فهد - عددالردود : 744 - عددالزوار : 27783 )           »          ليتك معي يا سلامه (اخر مشاركة : عبدالله المشعلي - عددالردود : 0 - عددالزوار : 3156 )           »          اختلطت الدماء (اخر مشاركة : سنان المصطفى - عددالردود : 0 - عددالزوار : 3857 )           »          ***عندما يهمس الســـــــــــــراب*** (اخر مشاركة : سراب - عددالردود : 3263 - عددالزوار : 107572 )           »          عبر عن شعووووورك (اخر مشاركة : سراب - عددالردود : 13530 - عددالزوار : 173737 )           »          اذا ودك تقول شيء تعال وقول اللي ودك (اخر مشاركة : سراب - عددالردود : 51444 - عددالزوار : 431537 )           »          الرجاء الدخول للأهمية (اخر مشاركة : أبو مهند العاطفي - عددالردود : 0 - عددالزوار : 6 )           »          دفتر الحضور اليومى للاعضاء!! ((سجل الحضور والغياب)) (اخر مشاركة : منيف العاطفـي - عددالردود : 6033 - عددالزوار : 102438 )           »          السلام (اخر مشاركة : سراب - عددالردود : 2 - عددالزوار : 17 )           »          نهار سبعة عشر (اخر مشاركة : سراب - عددالردود : 1 - عددالزوار : 14630 )           »         



منتدى قصص فرسان آل عاطف كل مايتعلق بتاريخ ال عاطف , وقعات , فريّس , عقدا ,

الإهداءات

إضافة رد
 
أدوات الموضوع انواع عرض الموضوع
قديم 07-11-2009, 05:16 AM   #1
معلومات العضو
عضو
افتراضي من فرسان قبيلة ال عاطف الجحادر قحطان

بسم الله الرحمن الرحيم
سوف اقوم بذكر بعض من فرسان قبيلة ال عاطف مع العلم ان هناك الكثير من الفرسان لم اذكرهم فارجو ا المعذرة

1)الشيخ الفارس / شينان بن مبارك بن سعيدان
هو الشيخ الفارس شينان بن مبارك بن سعيدان شارك في المغازي ضد عتيبه والدواسر ويام ومطير .
.وهو معروف بالكرم والشجاعة وهو يعد من أكرم الشيوخ في وقته رغم الفقر والعازه في ذلك الزمن يقولون إنه في الصفري وهو الوقت اللي بين الشتاء والصيف ومدته حوالي عشرين يوم ذبح للضيوف أكثر من خمسه وثلاثين قعود وأكثر من سبعين خروف وذلك من شدة الكرم رغم شدة الفقر والحالة في ذلك الوقت وفي أحد المرات قال الشيخ الفارس هذال بن فهيد الشيباني شيخ الشيابين لرجل من الضوره من آل عاطف يقاله مسيم كان قصير ٍ له وقاله يامسيم : [ من أكرم الشيوخ ؟ومن أطيب النحايا ؟ ]
وكان هذال الشيباني ينتظر من مسيم أن يقول له أكرم الشيوخ أنت ياهذال وأطيب النحايا الشيابين قال مسيم : أكرم الشيوخ الشيخ شينان بن مبارك بن سعيدان وأطيب النحايا [ آل محمد الجحادر] .
"النحايا " : معناها القبايل.
" آل محمد الجحادر " : المقصود منهم هم آل عاطف والمشاعله والخنافر والسحمه وآل سعد وآل روق .
[وقد قال فيه ابن بويريد :
ياخف ماعينـت لـي شينـان = قبل أمس يذكر من يمين خفيف
ما جاك من هو يكرم الضيفان = ياليتني ذا الليل عنـده ضيـف
وهو اللي يقول فيه الشاعر :

وسلّم على العواطف ربع شينان=عواطفٍ عند الملاقى حشادي
2) الشيخ الفارس مسفر بن هادي بن سعيدان
وهو معروف بالشجاعة الكبيرة والفروسية والكرم وعندما قتل الدواسر والده ولم يبلغ السابعة عشره من عمره قتل منهم أكثر من ستة فرسان لوحده وظهر صيته بعد هذه المعركة.
ومن شجاعته الكبيره كان يسمى [ أبا الذموم ] وسمي بهذا الأسم لأنه إذا أخذ الأبل أو الخيل أو سقط عنده الدم والذم ومعنى الذم أي يأخذ الأبل أو الخيل أو القتل أو ضربة يأخذها بالغصب ولا يستطيع أحد أن يفتكها منه .
قاد آل عاطف للكثير من الانتصارات في المعارك مع قبائل عتيبة والدواسر ويام ومطير.
وقاد آل عاطف وهم تحت إمارته والرجبان الدواسر بإمارة محمد بن وثيله [ حقطان ] للانتصار على عتيبه في نفود السر بعد إن أخذت عتيبه ابل واحد ٍ من الرجبان الدواسر واستفزعوا به الرجبان وردوا آل عاطف الابل ومعهم الرجبان لصاحبها .
عرف عنه قيادته للمغازي وحبه الكبير للغزو وكسب الأبل طيلة حياته ..
قتل وهو كبير في السن في معركة [ مخيبيه ] بين آل عاطف وآل العرجاء يام سنة 1328هـ وهو اللي يقول فيه الشاعر بعد انتصار قبيلة آل عاطف على قبيلة يام في معركة [ سر المدبغ ] بعد إن خذوا بثاره من قبيلة يام :
ياطير علمني بملحاق ال عاطف = علم الحياء والكاينات جياد
راعي آركٍ جاهم على زلافه = راعي آركٍ في شوره السداد
يوم شار شايرهم وشار أمشيرهم = وما منهم اللي شار بالعوّاد
يتلون هذّاب السرايا مجرّب = هذال حامي وانيات اسناد
ويتلون حزام قوّاد نمرى = دايم على راس الحفيف يذاد
ويتلون عاطف سعد الابل = ليا من ارزمت تبغى المقاد
نشد عليهم نايف ٍ من ذاهبه = وغدالهم في ذكرهم نفاد
طق ابن سجوى يوم سمع اعزاهم = ولابد صيّاد الفهود يصاد
كله لعينا ملهيٍ ومسفر = وجرمان اللي طاح في الميراد
وكله لعينا أهل مخيبيه = اللي مفرشٍ وملحفٍ بوساد
وكله لعينا جادل ٍ طاح سترها = وتقول تكفون يا الاجواد
برى الصدى من كبد كل مجرّب = والكبد طابت واشرعت للزاد




##[ هذال ] هو الشيخ الفارس هذال بن مسفر بن هادي بن سعيدان شيخ آل عاطف في زمنه.
## [ حزام ] هو الشيخ الفارس حزام بن مسفر بن هادي بن سعيدان .
## [ عاطف ] هو الشيخ الفارس عاطف بن مبارك بن سعيّد .
## [ نايف ] هوالشيخ الفارس نايف بن مناحي بن جرمان بن عويضه بن سعيدان .
## [ ابن سجوى ] الشيخ الفارس محمد بن سجوى شيخ آل العرجاء يام .
## [ كله لعينا ملهي ٍ ومسفر **** وجرمان اللي طاح في الميراد ] المقصود إن جميع القتلى من قبيلة يام في معركة " سر المدبغ " هم ثار للشيخ الفارس مسفر بن هادي بن سعيدان وولده الشيخ الفارس ملهي بن مسفر بن هادي بن سعيدان والشيخ الفارس جرمان بن هذال بن جرمان بن عويضه بن سعيدان الملقب بـ [ صلف ] وقد قتلواالثلاثه في معركة " مخيبيه " بين آل عاطف و آل العرجاء يام سنة 1328هـ والشيخ الفارس مسفر بن هادي بن سعيدان يقول فيه الشاعر:

ليا سندت لاخوان دقله قزا الخيال = على الرآية العليا مقاييد سلفاني
[ اخوان دقله ] هي عزوة الشيخ مسفر بن هادي بن سعيدان وأبنائه.

ومن أحدياته قبل إحدى المواجهات بين آل عاطف ويام مهدداً بأخذ ثار الشيخ الفارس ناصر بن مجدل بن سفران شيخ الخنافر الذي قتل من قبيلة يام يقول الشيخ مسفر بن هادي بن سعيدان :
يحرم عليهم منزل ٍ بفروان = لو كان منا شايب ٍ قد مات
والله إن أعديهم ورى الحدان = من فوق خيل ٍ ما دغلها افلات
[فروان ] جهة الصوق وهو حد قحطان مع يام.
[ شايب ] هو الشيخ الفارس ناصر بن مجدل بن سفران شيخ الخنافر قتل في معركة " هضان " بين آل عاطف والخنافر ضد قبيلة يام.

وهذه القصيدة عندما قتل الشيخ الفارس مسفر بن هادي بن سعيدان " أبا الذموم " وولده الشيخ الفارس ملهي بن مسفر بن هادي بن سعيدان والشيخ الفارس جرمان بن هذال بن جرمان بن عويضه بن سعيدان في معركة مخيبيه بين آل عاطف وآل العرجاء سنة 1328هـ وهي طويله منها:
القصيدة لواحد من فرسان آل العرجاء يام :

الخبره اللي فرعوا علمهم بان=علم(ن )يعلم به مع كل ساير
يوم بجال مخيبيه ثار دخا ن =لعيون خلفات(ن) عليها ظهاير
كله لعينا ناصر ذيب الاقران =حنا جعلنا عند ذوده عثاير
وحنا ذبحنا الشيخ ترثة سعيدان =وملهي ( ن) عيد الركاب الحداير

## [ كله لعينا ناصر ذيب الاقران ] المقصود هو العقيد الفارس ناصر بن مصلح آل عسكر آل مرهم آل العرجاء واللي ذبحه هو الشيخ الفارس سعيدان بن مسفر بن هادي بن سعيدان ذبحه وهم على ظهور الخيل وعقب ما خذوا آل عاطف أبل آل مرهم آل العرجاء من على [ عد ] مخيبيه استفزعوا آل مرهم ببقية آل العرجاء وحصل الرمي عقب ما دخلوا آل عاطف كلهم في شعب مخيبيه قاموا يرمونهم الياميه.
## [ الشيخ ترثة سعيدان ] المقصود هو الشيخ الفارس مسفر بن هادي بن سعيدان " أبا الذموم " .
## [ ملهي ] المقصود الشيخ الفارس ملهي بن مسفر بن هادي بن سعيدان .
3) الشيخ الفارس جرمان بن عويضه بن سعيدان
وهو معروف بالشجاعة والكرم شارك في المغازي ضد قبائل عتيبة والدواسر ويام ومطير حتى أن الشيخ الفارس محمد بن هادي بن قرملة يوم كبر فس السن جلس وتعزب عند الشيخ الفارس جرمان بن عويضه بن سعيدان فقالت فيه بنت الدويش شيخ مطير بعد إحدى المعارك بين الجحادر ومطير:

الشيخ والله جرمان=...........................
خيل ٍ حداها جبهان= ياذلها ذي النوبه
.

4. الشيخ الفارس / مناحي بن جرمان بن عويضه بن سعيدان
شارك في المغازي ضد عتيبه والدواسر ويام ومطير اشتهر بالشجاعه والكرم وكان يسمى : [ ابو كبيده] واللي سماه بهذا الاسم الشيخ الفارس هذال بن فهيد شيخ الشيابين .
والشيخ مناحي بن جرمان له الكثير من المساجلات والمواجهات وخاصه مع هذال بن فهيد الشيباني

يقول الشيخ/ مناحي بن جرمان ال سعيدان
يانجد سامحني ثلاث سنين= مادام تثليث زفا مرعاه
يصبر علينا دامنا مسنين = لين الحياء ينقاد من منشاه
ياراكب اللي ما دقلها القين= ما ساقها الجمال في المنحاه
تلفي بنا راعي الجواب الزين = ابو جهز رده وانا ملفاه

لابدنا من بعدنا دانين = وكم نادر ٍ بنحورنا ناطاه
خيالكم عرّض على الكمين = من ولب خيّال يعرف اعزاه


يقول مناحي بن جرمان
الله عطاني منوتي = غوج يشعثر بالسبيب
ياكليب وصل هرجتي = لبو جهز يومك ربيب
ورعه قزا من حربتي = وابوه من قبله صويب
الله يقدي حربتي = في ابو جهز ولا شبيب
المقصود من أبو جهز الشيخ هذال الشيباني شيخ الشيابين والمقصود من شبيب هو الشيخ شبيب بن حجنه شيخ النفعة

وقال الشيخ هذال الشيباني :
ياراكبٍ من عندنا فوق ثنتين=صوب الجنوب مناحي ٍ تنصاه
إن كان يطري الحزم والضيرين=يحرم على مثله برايد ماه

المقصود في (الحزم والضيرين ] جبال حول الحصاه

فردعليه الشيخ مناحي

إن كان تطري الحزم والضيرين=دار وخام ٍ ولا نبي مرعاه .
ترى الوعد جر الشعيب الزين=ما بين صبحا و الحصاه
وقال مناحي يقصد هذال
هو ماخبر يوم بخشم غرور = يو م حصة بالضعن تنخاه
يضرب بشلفا حدها مسمور = من فوق الأبهر في قوى علباه


والشيخ مناحي بن جرمان بن عويضه بن سعيدان ذبحوه يام بالغدر والقصة إن كان به هيّة بين آل عاطف و يام قاموا آل عاطف وضيقوا على اليامية لين قاموا الياميه وطقوا للجبل وحاصروهم آل عاطف قال الشيخ مناحي بن جرمان لليامية انزلوا من الجبل وتراكم في وجه مناحي بن جرمان قام الياميه ونزلوا من الجبل وهم رايحين مع مناحي بن جرمان قام واحد ٍ منهم وفي غفلة من الجميع قتل الشيخ مناحي بن جرمان وقاموا آل عاطف ومسكوا اليامية وعددهم خمسة وعشرين رجال وذبحوهم وحطوهم على النار حسرة بمقتل الشيخ مناحي بن جرمان
5.الشيخ الفارس ملهي بن مسفر بن هادي بن سعيدان

وقد شارك في العديد من المغازي ضد قبائل عتيبة والدواسر ويام ومطير وهو من المعروفين بالكرم والشجاعة الكبيره وهو اللي صوّب الشيخ هذال الشيباني في وقعة [ أبو هميد ] بين آل عاطف و الشيابين ومعهم العصمة في وادي الركاء حول الحصاه وفي نفس المعركة قام الشيخ الفارس ملهي بن مسفر بن هادي بن سعيدان بقتل الشيخ مصلح بن فهيد الشيباني وقام بقتل الشيخ سلطان بن هذال بن فهيد الشيباني
يقول فيه بن فتنان آل روق في كون ابو هميد

ياطول ماني صابر ٍ كن ما بيش = من عقب ذود ٍ في مفاليه زيعي .
بعتوا عليهم بيعة ٍ يا قريويش = ترثة دخين ٍ مع مورث سريعي .
مضرابكم ماهو يهوز وتريش = واردينهم ورد القطا الشريعي .
عواطف ٍ في اللقاء أظفر من أيش= كم يتموا من دلقهم من رضيعي .
لحقوا هل البلها بعلط مراييش = والكل منهم راس رمحه دريعي.
واللي رماه ملهي ٍ جعله يعيش = يستاهل اللي لحبته ما تبيعي .
حوّل بمصلح بين هذال وعميش = والكل منهم لجنبه ما يريعي .
مصلح وسلطان عشا لابرق الريش = وأبا العلا ردوه قده منيعي.
وقفى جهز يقول ما عاد مني أيش = من عقب ماهو للركايب وديعي .
وأنا من آل محمد الهشاهيش = عزي لمنهو من حسبهم يضيعي

ــ [ اللي رماه ملهي] الشاعر يقصد الشيخ ملهي بن مسفر بن هادي بن سعيدان
ــ [ حول بمصلح بين هذال وعميش ] مصلح هو الشيخ مصلح بن فهيد الشيباني وهذال هو الشيخ هذال بن فهيد الشيباني وعميش من فرسان الشيابين
ــ [ سلطان ] هو الشيخ سلطان بن هذال بن فهيد الشيباني قتل في المعركة
ــ[ أبا العلا ] هو الشيخ سلطان أبا العلا شيخ قبيلة العصمة وردوه آل عاطف مع المنعى ذاك اليوم .
ــ [ جهز ] هو الشيخ جهز بن هذال بن فهيد الشيابين شيخ الشابين بعد والده يوم شاف أخوه سلطان ذبح أنهار وترك المعركة .
وللمعلومية الشيخ ملهي بن مسفر بن هادي بن سعيدان يسمى [ سويد ] لأن بشرته سمراء وإذا أحد من القبايل ينوي يغزي على آل عاطف يقولون إن كان سويد معهم عودنا وهونا وذلك لشدته وشجاعته وقوته

6)الشيخ الفارس هذال بن مسفر بن هادي بن سعيدان
تولى المشيخة على آل عاطف بعد موت أبوه مسفر وأخوه ملهي سنة 1328هـ كان له العديد من المغازي ضد قبائل عتيبة والدواسر ويام عرف عنه الشجاعة الهائله والكرم والزعامة في وقته يقول فيه الشاعر :

ومن عقبهم نصيت ترثة سعيدان=وأبغى العوض منهم في قعودي
أميرهم هذال قواد سلفان=خيّال حرد ٍ في اللقا ما تحودي
.


والشيخ هذال بن مسفر بن هادي بن سعيدان خذا في دم أبوه مسفر وأخوه ملهي أكثر من عشرين رجال من قبيلة يام في معركة [سر المدبغ ] بين آل عاطف وآل يام وقال فيه الشاعر معجب بن بويريد الضوره آل عاطف:


ياطير علمني بملحاق ال عاطف= علم الحياء والكاينات جياد
راعي آركٍ جاهم على زلافه = راعي آركٍ في شوره السداد
يوم شار شايرهم وشار أمشيرهم = وما منهم اللي شار بالعوّاد
يتلون هذّاب السرايا مجرّب = هذال حامي وانيات اسناد
ويتلون حزام قوّاد نمرى = دايم على راس الحفيف يذاد
ويتلون عاطف سعد الابل = ليا من ارزمت تبغى المقاد
نشد عليهم نايف ٍ من ذاهبه = وغدالهم في ذكرهم نفاد
طق ابن سجوى يوم سمع اعزاهم = ولابد صيّاد الفهود يصاد
كله لعينا ملهيٍ ومسفر = وجرمان اللي طاح في الميراد
وكله لعينا أهل مخيبيه = اللي مفرشٍ وملحفٍ بوساد
وكله لعينا جادل ٍ طاح سترها = وتقول تكفون يا الاجواد
والشيخ هذال بن مسفر بن هادي بن سعيدان أدرك الملك عبدالعزيز وشارك معه في العديد من المغازي مثل تربه والرغامة وفتح الطايف والسبله وباقم وحرب اليمن [ الخبت ] وكان معه بيرق أهل الرين[ شلوان] يوم فتح الطايف سنة 1343هـ والبيرق الثاني مع الشيخ حزام بن هزاع بن عمر بن قرمله وقصة البيرق له قصة كان مع الشيخ حزام بن هزاع بن عمر بن قرملة قام الشيخ هذال بن مسفر وقال والله إن ناخذ البيرق معنا يآل عاطف غصب على اللي يرضى واللي مايرضى قام وقال الشيخ هذال بن مسفر بن هادي بن سعيدان لآل عاطف اللي معه من اللي ناشد ٍ أبوه من خاله ويجيب البيرق قام اثنين من الفرسان وهم مذكر بن غتران آل خامسة آل عاطف والثاني الفارس شبيب بن سويره آل غيث آل عاطف وراحوا وجابوا البيرق وعطوه الشيخ الفارس هذال بن مسفر بن هادي بن سعيدان وكادت أن تحدث مشكلة كبيرة بين آل عاطف وبين قبايل قحطان اللي في الرين وعندما عرف الملك عبدالعزيز بالسالفة أرسل بيرق ثاني وعطاه ابن عمر وصاروا أهل الرين لهم بيرقين الأول البيرق شلوان مع آل عاطف بقيادة الشيخ هذال بن مسفر بن هادي بن سعيدان والبيرق الثاني مع الشخ حزام بن هزاع بن عمر بن قرملة .
توفي الشيخ هذال بن مسفر بن هادي بن سعيدان سنة الخبت عام 1351هـ هو وأخوه الشيخ حزام بن مسفر بن هادي بن سعيدان وقد رثاهم الشاعر ظافر بن جملا آل جابر العاطفي بقصيدته اللتي رثى فيها الشيوخ اللي ماتوا في الخبت :

وأنا أبكي شيوخ ٍ راحوا يقودون جرود=على ضمر ٍ كن التهامي يباريها .
وأنا أبكي على من مات وأفزّ بالمالود=وياخالق الدنيا عليك العوض فيها
ما بشروا بهذال ٍ و نايف ٍ وحمود=وما بشروا بحزام حامي تواليها
المقصود من [هذال ] الشيخ الفارس هذال بن مسفر بن هادي بن سعيدان
المقصود من [ نايف ] الشيخ الفارس نايف بن مناحي بن جرمان بن عويضه بن سعيدان
المقصود من [ حمود ]الشيخ الفارس حمود بن مناحي بن جرمان بن عويضه بن سعيدان
المقصود من [ حزام ] الشيخ الفارس حزام بن مسفر بن هادي بن سعيدان

7) الشيخ الفارس حزام بن مسفر بن هادي بن سعيدان
وكل الكلام اللي قيل في الشيخ هذال بن مسفر بن هادي بن سعيدان ينطبق على الشيخ حزام بن مسفر بن هادي بن سعيدان شارك في المغازي ضد عتيبة والدواسر ويام أدرك المللك عبدالعزيز وشارك معه في تربه والسبلة والرغامة وفتح الطايف وباقم والخبت يقول فيه الشاعر :



وحزام ساس الجودمن ساس شيخان=عند اللقا لزمن يقص الحيودي
.

وهو اللي قال فيه الشاعر :

يتلون حزام قوّاد نمرى=دايم على راس الحفيف يذاد


توفي سنة الخبت عام 1351هـ

8) الشيخ الفارس عشق بن مسفر بن هادي بن سعيدان
تولى المشيخة على آل عاطف بعد موت أخوه الشيخ هذال بن مسفر سنة 1351هـ اشتهر بالشجاعة والكرم شارك في المغازي ضد قبائل عتيبة والدواسر ويام اشتهر با لحمية لربعه في كل محفل وكل هيه أدرك الملك عبدالعزيز وشارك معه في تربه والسبله والرغامة وفتح الطايف والخبت وباقم يقول فيه الشاعر :



أما عشق لاعتلا بنت ربدان=يطعن لعينا ناقضات الجعودي


ويقول فيه الشاعر جبران بن رويشد المشاعله سنة الخبت 1352هـ يوم ب الشيوخ ماتوا بوباء الخبت إلاّ هو سلم منها ماجاه شي يقول الشاعر :
الصبي المشعلي هاض سالفه = سوالف تمضي حضور شهودها
واللي مهيضني ومقارب حضايري = وقعة تهامه الله لايعودها
لاجيت بكن عبرة جاء مثلها = قدور تغش وزللوها حدودها
ياكم غدى من نادر يذكرونه = خويه على نفسه ذلوله يقودها
سعيدانية ٍ تثني الذاري فيدون جارها = والاجواد ما تجعل ذراها وقودها
سعيدانية ٍ تذري بكبارها وصغارها = تذري على حزن الظفر من قرودها
عشق حجاب البيت في كل سابق= له لطمة سو البلاء في زنودها
حلو ٍ لا بغى ومر ٍ لابغى = له لطمة ٍ لابغى جاد جودها
ان كان في الحيلات فلافيه حيله = الا إن تحول تهامه من حيودها
تفرح به الرملاء لمن غاب سترها = هو سترها لمن غاب منها شدودها
وتفرح به العشوا لمن تزعزعت = أمعشر ٍ تسمع عوى مفرودها
أنا لاصافيت صافيت صميدع = صبور ٍعلى عسر الليالي وجودها
ماني لاصافيت صافيت رمه = مثل المعايا ماتسر جلودها
توفي كبيراً في السن وعمره يقارب التسعين عام سنة 1376هـ ودفن في لبنان حيث كان يعالج .

9..عاطف بن مبارك وشرثان بن مبارك
وهم شيوخ ال سعيد من ال عاطف المشهورين بأخوان زبنه ولهم معارك مشهورة وهم من عناهم الشاعر مبارك بن معدي الحواصله
خوان زبنه شيوخ القوم حربية = لثار عج الرمك والجيش هروالي
لمن حصل غارة كنها تهاميه = خيالهم يقلع بعشرين خيالي
وقال اخر
اخوان زبنه كاسبين النواميس = كم كسبو خطوا رعاع رعابي
إليا اعتلوا لايجات المضاريس = يشبع بجرتهم هزيل الذيابي
وقد قتل عاطف بن سعيد في احدى المعارك مع سبيع الشيخ ابن هملان القريشي
وقتل ايضا مسفر بن شبيب بن قويد في معركة وادي حبيش
وقد قتل شرثان بن سعيد احد ابناء شبيب الحجنه لم يحضرني اسمه وقد قتل معه ستة فرسان من قومه في المحتجبه في بتران
ومما قيل فيهم في احدى المعارك مع يام
يتلون هذاب السرايا عاطف = زيزوم عيرات تبوج ابعاد
طق بن سجوى يوم سمع اعزاهم = ولا بد صياد الفهود يصاد
وقال الشاعر قراش الفرساني
ياذيب فحامة مع ذيب قمشان = ارفع لسنح لين تاتيك ذيابه
طق ين سجوى وتلا القوم شرثان = مثل البهم لتلته الذيابه
وقد شاركو مع المللك عبد العزيز في توحيد المملكة وابرزها فتح الأحساء ومعركة عفاس بن محيا

10- الفارس حقيب ال شريم ال عاطف
هو اول من وضع وابدع الجيرة وسنها عند قحطان وقد انشد شاعر من آل عاصم من آل سليمان الجحادر
ما في الشفا غرس إلى ما جلينا =إلى اقتضا الديان من كل مديــون
جينا ابن ذيبان ونفه علينا=وقال ابن لبده مانــع لا تحلــون
وجينا ابن صيفان وسرى علينا =كوماً شحمها غرق القدر وصحون
حنا زبنـا العاطـفي والتجينا=بروس الهضاب اللي ذراها يذرون
ترثـة سريـع مفيـة كل دينا=اللي على سلم الجحـادر يعـدون
وحقيب عقب الضيق فرج علينا=عواطفٍ تروي شبا كل مسنــون
11-الفارس حجيلان بن هادي ال عاطف
وهوالقائل
خذيت في النجفا شعف ياوقيان = ضبع الدويرة حطته في سحرها
12. الفارس حماد بن مثقال الشلاط ال خامسه ال عاطف
وهو من عناه الشاعر
ياهويج جيت العاطفي ذيب الأضماد = تبغي ممجاهيم الضهور المتاني
عيوا على الحرشا حمود وحماد = عيو عليها الاثنين الخواني
تختار شعفه في شغاميم الاولاد = يوم اطلقوها ناقلين الوحاني
13.الفارس دويخ بن شداد بن يحيا ال عاطف
وهو القائل
اشوف ذودي ودها بالمنحا = تبي مرابيع مع صلب لابه
عواطف حرابهم مايصحا = يمسي وناقوس البلاء في جنابه






  رد مع اقتباس
قديم 07-11-2009, 05:18 AM   #2
معلومات العضو
عضو
افتراضي يتبع

14.الفارس سعيد بن زي الرحمان ال عاطف
يقول دوسري في ذلوله يتمني الغارة والكسب عليها من أهل تثليث

يفاطري ياللي تثالع دبرها = ياطول مانيش يكب الشدادي
شفي عليها غارة في حضرها = في جر تثليث حوالي البجادي
يما حلى الغنا في ظهرها = لا نكبت الحزم تبغى البلادي
فرد عليه بن زي يحذره

والله ان اجيلك عزره من عزرها= في الليل حراس وفي الصبح بادي
بنذرك من جبعا حشاد سحرها = تجعل عظام الساق مثل التوادي
ويقال انه اغار على اهل تثليث كما توعد وكسر من ساقه من قبل بن زي وجبرة وحماة ولكنه مات على خلفية اصابته
15.ظافر بن مجمش الحواصله ال عاطف
شاعر وفارس وهو القائل
الورع شاف له شوف رهيب = شاف الخيل مرخيت رقابها
نطحتهم يو الردي يتقيبي= ولي هقوتن ماحد هقابها
وذبحت شيخ القوم وركبت مركبه = ورديت انا العرفا وهو قد نوابها
وعديتهم منها وقفت دونها = بالي من المصنع قصير خشابها
ياما نحينا مندونها من فارس = امن غزانا غازيا ماغدابها
16- الشيخ والفارس محمد ابن ولمه ال شريم
له صولات وجولات وبطولات معروفه في نجد
17. الفارس عريمان بن شعير ال مبارك ال عاطف
صاحب بندق مشهوره تسمي المجر ويقول العرافة من الخنافر

قال العرافة بادي في مرقب= راس الرميدي علها كشافي
ياطير علمني بملحاق الدخن = بالصدق فن قلبي لهم ميلافي
معهم عرمان مثور غرهم = وقعت مجره مالكونه رافي

18.فهيد بن عيد الفحيثه ال كعدة ال عاطف
يقول شاعر من الخنافر
واللي حضر من ربعنا العواطف = فهيد الفحيثه للمدوح اشتالها
19.الفارس مجحود بن دخيل ال هتلان الضورة ال عاطف

ذبحت في الدقل الأول سته = والسابع اللي لذتله بسكاتي
اقبلبهم واقفيبهم والوفهم = لوفان شعف في فنود عضاتي
كله لعينا اللي صفوق ذيله = رخو المهادل نابي الجمهاتي

20. معجب بن بوريد من الضورة ال عاطف
استر لحالي يوم شفت حمود = تو الهزايم و الضعن خلاه
يوم على ماضي عساه يعود = يبغي الجبل والضلع منجاه
عواطف تركض على البارود = كل ابلج دز العقيد مناه
21. ميجم ال خضيرة ال شريم ال عاطف
فارس وشاعر
مقال ميجم بدا في راس نوافي = في راس رجما مذبه نأف وعرا
فيده فرنجيه تعجب بالأوصافي = خمس رصاصة وسته وافي الشبرا
اشخل لها الذوب واغذي لها الصافي = وذبالة كنها الزاروق لاظهرا
اما نوافق عقيد القوم بنكافي = ولا شينان يحك الغار بحبرا
تلقا مواقيعها من حول الأنجافي = وان كان زمت بتبترحقوت الظهرا
22. الفارس منصور بن جابر ال مبارك
له وقعات كثير ة في بلاد الجنوب ومن هذه الوقعات وقعت باقم وقعت نعام
وقال قواش بن منصور الفرساني

المرجلة في لا يحا فيه طارود = ولا يجيها كل غمر هداني
فأسفل نعام ثاير فيه بارود = من وقع خلان البنات الزياني
كم واحد من ضربهم زاور الدود =منم ضرب منصور حطوم العناني
23- قريويش الضورة ال عاطف
وقال الشاعر ابن فتنان ال روق في احدى المعارك بين العاطف والخنافر على عتيبه ابيات ومنها ذكر فارسنا قريويش لشجاعته وبطولته في المعركه وحارب في المعركه بخيله ورما عنانها لكي لاترجع به الخيل وناطح القوم في هالمعركه
بعتوا عليهم بيعة ياقرويش = ترثت دخين ومورث سريعي
مضرابكم ماهو يهوز وتريش = واردينهم ورد القطا لشريعي
24- باني بن حنيف ال حواصله
"الحجباء" فهي عزوة ٍ ل "باني بن حنيف" من الحواصله من آل عاطف ...وكان من رجال الملك عبدالعزيز (رحمهم الله ) وشارك في اكثر من موقعة اهمها فتح الحجاز والجنوب الى ان تم توحيد المملكة . وهو من الرجال الذين لحقوا على ايام المغازي قبل توحيد المملكة . وحسب ما اعرفه بانه توفي قرابة عام 1360 هجري. وهو من قال فيه الشاعر الحمالي :

ما عاد لي ب "الجو" من عقب باني =ماعاد لي ب "الجو" واللي سكن فيه

وقد قال هذه القصيده بعد ان جاور باني بن حنيف مدة من الزمن ثم رحل باني عن "جو" الى مكانٍ آخر.
وقد ذكر لنا احد الشيبان في معرض الحديث عن باني بن حنيف ان الملك عبدالعزيز طلب منه ذات مرة ان يترك حياة الباديه ويستقر في الرياض بعد توحيد المملكه , ولكن باني بن حنيف كان راغبا ً في تلك الحياة لتعوده عليها.

25- الفارس / محمد بن حسن بن عمير ال شريم ال عاطف
(( الملقب بــ نعيجان ))
لقد عزم الفارس نعيجان سنة من السنين ان يحج وقد شد رحالة واخذ ذلولة
وذهب يقطع الصحاري في نجد متجهاً لمكة المكرمة وخلال رحلتة واجه في طريقة
مجموعة من رجال اهل الحوطة من اهالي الحلوة متجهين الى مكة ايضاً
وقد تخاوى معهم واتجهوا سوا الى مكة وكان من اوصاف الفارس نعيجان
انة طويل القامة عريض الوجه اسمر اللون ومن صفاتة ان قليل الكلام جداً جداً
وكانوا هل الحوطة خلال استراحاتهم اثناء رحلتهم يتحدثون ويضحكون و الفارس نعيجان ساكت لا يتكلم الا في وقت اللزوم و قاموا اهل الحوطة يعيرونة بأسم نعيجان
لانة ساكت لايتكلم ولا يتحدث جالس في حالة عندما شافوة لا يتكلم ولا يخاطب احد
وايضاً كانوا يصبون القهوة فيما بينهم ويعدون الفنجال عن فارسنا قاموا باحتقارة
وعدم القيام بواجبة ولكن الحاصل عند مرورهم على احد هجر ومناطق عتيبة
اغار على اهل الحوطة قوم من عتيبة وسلبوا جميع ابلهم وركابهم
وقام فارسنا ( محمد بن حسن بن عمير ) واخذ فرس من اهل الحوطة بعد الحاح شديد
لانهم رفضوا اعطاة الفرس محتقرينة !! لكن في نهاية الامر اعطوة الفرس
وذهب على ظهر الفرس وقابل القوم المغيرين وقتل منهم 14 رجلاً
وقاموا البقية بترك الابل واخذها نعيجان لاهلها وهم اهل الحوطة .........
وقال هذة الابيات :
سموني نعيجان وانا محمد =وانا اللي انطح دقلها في ورودها
عدوني الفنجال وانا الموالي = ادقاق العلابي مضيعات أجدودها
والقصيدة اطول من كذا لكن لا تحضرني الان ........... وبعدها قاموا بالاعتذار منة واكرموة وقاموا بواجبة!!

26)الشيخ الفارس هذال بن جرمان بن عويضه بن سعيدان
27)الشيخ الفارس جبهان بن جرمان بن عويضه بن سعيدان
28)الشيخ الفارس سلطان بن جرمان بن عويضة بن سعيدان
29) الشيخ الفارس هادي بن مسفر بن هادي بن سعيدان.
30) االشيخ الفارس سعيدان بن مسفر بن هادي بن سعيدان
وهو اللي ذبح أحد شيوخ آل العرجاء يام في معركة [ مخيبيه ] سنة 1328هـ بين آل عاطف بقيادة الشيخ الفارس مسفر بن هادي بن سعيدان وبين آل العرجاء يام وفي إحدى المغازي بين آل عاطف والخنافروآل فهاد يام عقب ما خذوا آل عاطف والخنافر أبل آل فهاد يام كان الشيخ سعيدان بن مسفر بن هادي بن سعيدان على فرسه يحدي وهو يسوق ابل آل فهاد يام عقب ما خذوها آل عاطف والخنافرو يقول :
نرعاك يالعفراء الطفوح = ما همنا بارود يام


31) الفارس صملول بن مسعود آل شريم .
32) الفارس علي بن راجح بن القينه العطافا آل شريم .
33) الفارس عشق بن مفرع ابن الجيطاء الضوره المشهور بـ [ الاصقع ]
34)الفارس حزام بن الجيطاء الضوره المشهور بـ [ الجلد ] .
35) الفارس علي بن مجثّل آل رحمان .
36) الفارس عايض المشبح آل جابر .
37) الفارس قاروط آل شريم .
38) الشيخ الفارس مسفر بن شينان بن مبارك بن سعيدان.
39) الفارس دليان بن محمد آل عبدان
وهو اللي ذبح من فرسان يام الكثير ثار ٍ لعمه الشيخ سعيدان اللي ذبحوه يام حتى قال فيه الشاعر اليامي:
واللي خذانا في المغازي دليان = مر ٍ مع ربعه ومر ٍ فرودي.


40)الشيخ الفارس نايف بن مناحي بن جرمان بن عويضه بن سعيدان .
41)الفارس ضبيب بن جري آل شريم.
42) الفارس دويّخ بن وفرا آل غيث .
43) الشيخ الفارس عبدالله بن صرير بن مبارك بن سعيدان المشهور بـ [ معباس ].
44) الفارس عفّار بن دغش آل خامسه .
44)الشيخ الفارس جرمان بن هذال بن جرمان بن عويضه بن سعيدان المشهور بـ [ صلف ] .
46)الشيخ الفارس محمد ن هذال بن جرمان بن عويضه بن سعيدان
47) الفارس ظافر بن جملا آل جابر.
48) الفارس معيان بن جبهان آل فرسان .
49) الفارس مذكر بن غتران الخامسي .
قال عنه موحد الجزيره في احد مجالسه( ان احب الناس اليه هما اثنين مذكر بن غتران وشخص اخر لايحضركاتب هذه السطور الان اسمه)

2-اول غزواته كانت تحت رايت صقر الجزيره الملك الموحد عبد العزيز بن عبد الرحمن وكان صغير ا بعثه الملك عبد العزيز في احدا الغزوات وكان سلاحه مشعاب المهم كان معهم فرس جت هديد من ابن هذال شيخ عنزه مهداه للملك عبد العزيز وكانت ماتخلي احد يركبها اسمها سوده فلما وصلو الهدف امسو والصبح ارادو ان يصبحو العدو فطلب اميرهم من مذكر ان يجلس ويمسك سوده فسكت وخلاه يروح ثم طلب من احد افراد الغزيه يمسكها فارادت ان تسقطه فعسفها بالمشعاب لين طاعت وخلا الشعب الي راحو معه ولحقهم مع شعبن اخر وكسب من 7 الى 8 من البل 0رجعوا وسال اميرهم من قبل الملك عبد العزيز عن مذكر قالوا ركب سوده ولحقكم فقال الله يرحمه طرحته سوده في احد ذا الشعبان ومات 0المهم ماشافو الا هو جاي ومعه البل ويقول ابشروا بالخيال والبل ................................عادو للرياض واخبروا الملك عبد العزيز بالقصه فقال سوده لمذيكر (هكذا يقول له الملك عبد العزيز لصغر سنه واعجابه بفروسيته )وبقيت معه لين قتلت في احد المعارك

3-ارسله الملك عبد العزيز ليوطن قبايل قحطان الي في الرين والحصاه وفعلن قسم الرين بينهم كما هو الان ثم اتجه للحصاه وامر عليها فنيس بن حويل الذي لم يجد ما يكافاهه به الا ان زوجه بنته بنت فنيس
4-حمل راية ال عاطف في معركة تربه اسم الرايه على ماذكر شلوان لانه الرصاص قطعها ولم يبقا منها الا قطعه
5-في المعركه السابقه كان هناك احد المهاجمين اظنه تركي يحمل رشاش ولم يكن الباديه يعرفونه فرشهم به وقتل خلقن كثير فقام مذكر وكان سلاحه سيف فظربه على راسه فانقسم السيف الى نصين فظربه بالنص الثاني لين مات
6-استولا على الرويس في جده من الاعداء فقام بحصار الاعدا ومعه حول العشره وهو حافر مثل الخندق والرويس كان مكان قبالة جده تاتي اليه الامدادت للعدو ومن الطرائف انه كان يصلي بربعه الي معه في جنب هذه الحفره اثر العدو رصدهم واطلق قذيفه مدفعيه وكانت لها صوت مميز وكانو راكعين فقذف بنفسه في الحفره ومجموعه بسيطه اما الباقين مادرو جلسو راكعين فمرت من فوقهم وسقطت بعدهم بمسافه وانفجرت لدرجت انها تغير لون ثوب عبدهم سعيدوالسالفه طويله انتهت باسقاط الرويس .............
7-في معركة الحسا تسلق هو وتقريبا عشره منهم واحدن عتيبي اسمه تركي اوخالد لم يحدد الراوي اسمه بدقه تسلقو بسلم الحصن وجلسو في السطح ينتظرون يهدا المكان المهم مر احد الاتراك فتفاجأ بهم وكان يحمل مسدس يسمونه على ماأظن برابره فذبحوه وطمروا داخل مكان في الحصن جالس به مجموعه بسيطه من العسكر فاسروهم كدروع بشريه واطعنو واحدن منهم ودفوه على ربعه ثم اشتغلوا في حفر ثقب بجدار الحصن لين فتحوه صوب ربعهم ويقول الراوي وبعد ذللك لاندري ما حصل ولكن انسحب الاتراك سلميا من الحسا
8-لما قتلت فرس الملك عبد العزيز ركبه على فرسه وركب هو مع العبد سعيد الماجد عبد الملك عبد العزيز ولقصه باختصار انه انطلق الملك عبد العزيز مع قواته خف وحافر من المذنب قاصدا الشعرا وهناك كنه تظايق من بعض السوالف الدايره بين خوياه ومن ظمنهم مذكر بن غتران لامور تتعلق بالوقت المناسب للهجوم ومن الظريف ان مذكر جاه يبي يتزود بالرصاص فعاتبه وقال ماعندنا فشق ولكنه امر عبده فاعطاه غمطة فشق المهم هجمو ا وكسبو القوم وفي الرجعه يوم جاو في منطقه اسمها ابو دخن وكان مافيه لاطارد ولامطرود منتشرين وهم راجعين نزل مذكر من فرسه في شعيب ولما صعد لفرسه لذا الملك عبد العزيز ومعه عبدينه احدهم سعيد الماجد فذهب له وسلم عليه وفيما هم يسولفون الا وحدعشر رجال او حولهم قادمين فقال مذكر امتنعو يا هل الخيل وكانت البيرق مع ابن مطرف غبا عنهم والامير تركي بن عبد العزيز المهم رماهم ابن غتران بالصمعا فذبح واحد فتفرقو الى نصفين فرما عبيد الملك وذبحو اثنين فانحاشو العدوان يقول بن غتران مادرينا الاصوت البندق بينا لينها في حصان الملك عبد العزيز اثرواحن منهم عود ورمانا ثم انحاش يقول فركبت الملك عبد العزيز على فرسي الي توها باريه من اصابه في رجله من احد المعارك السابقه يقول وركبت مع عبد الملك وجينا لاحقين ربعن في ذا الاثنا الامير تركي تباط ابوه الملك عبد العزيز فقال ماحنا بمتحركين لين ياتي ابوي فبعث حمله قابلتهم في الطريق متعبين ولقصه طويله ولايسمح المكان بشرحها كامله وعند الشيبان خبرها وهذه هي المناسبه الي جعلت الملك عبد العزيز فيما بعد يقول ان احب من له ابن غتران

50- جرمان بن فهد بن محمد ال حفيان ال عاطف
اصغر فارس :وهو الذي قتل الشيخ :مـــشل الدويش امير المطران حين غار عليهم في هجرة المناخ بقرب هجرة نــــساح وقتله وهو في الثامنة عشر من عمر ه
ــــــــــــــــــــــــــــــــــــــــــــــــــ
وفي الختام لايسعني الى ان ارحب بكل من لديه اضافات او تعديل فكلنا نجتهد واتمنا ان الموضوع يكون عند استحسانكم


تقبلوا تحياتي
اخوكم فهد بن محسن بن عمير ال شريم ال عاطف






  رد مع اقتباس
قديم 08-11-2009, 02:21 PM   #3
معلومات العضو
ذهبي

المشرف المميز 
وسام التميز 
افتراضي

السلام عليكم ورحمة الله وبركاته

ابيض وجه يافهد على طرح قصص بعض فرسان آل عاطف


والله يغفرلهم جميع واموات المسلمين


تحياتى لك






التوقيع

  رد مع اقتباس
قديم 08-11-2009, 11:59 PM   #4
معلومات العضو
كبار الشخصيات

الصورة الرمزية خيال الزرقاء
افتراضي

بيض الله وجهك على هالموضوع الرائع

شـكــ وبارك الله فيك ـــرا لك ... لك مني أجمل تحية .







  رد مع اقتباس
قديم 09-11-2009, 04:53 PM   #5
معلومات العضو
ابو فيصل
زائر
إحصائية العضو





حالة الاتصال والنقاط

الحالة :
نقاطي :  
آخر مواضيعي

0 الصوره تتكلم

 

الاوسمة والمراسله  


افتراضي

من فرسان ال عاطف /
الشيخ الفارس / محمد بن عشق الجيطاء الظوره ( اخو هلا)
الفارس / معجب بن محمد بن بويريد ال فحيله الظوره
الفارس / مانع بن حزام الاسود الجيطاء الظوره
الفارس / فهد بن مهدي ال فحيله الظوره
الفارس / عاطف بن شايق الحواصله
الفارس / مجحود الهتلان الظوره
وتقبل مروروي







  رد مع اقتباس
قديم 10-11-2009, 01:11 AM   #6
معلومات العضو
••«§»(حمد العاطفي)«§»••

الصورة الرمزية خشم طويق
إحصائية العضو







حالة الاتصال والنقاط

الحالة : غير موجود
نقاطي :  470
آخر مواضيعي

 

الاوسمة والمراسله  


افتراضي

ابيض وجه يابومحسن على طرح قصص بعض فرسان آل عاطف


والله يغفرلهم جميع واموات المسلمين


تحياتى لك







  رد مع اقتباس
قديم 10-11-2009, 01:24 AM   #7
معلومات العضو
عضو

الصورة الرمزية عاطفي قبيله ومشاعر
إحصائية العضو






حالة الاتصال والنقاط

الحالة : غير موجود
نقاطي :  10
آخر مواضيعي


 

الاوسمة والمراسله  


افتراضي

ابيض وجه يابومحسن على طرح قصص بعض فرسان آل عاطف


والله يغفرلهم جميع واموات المسلمين


تحياتى لك







  رد مع اقتباس
قديم 12-11-2009, 03:09 AM   #8
معلومات العضو
عضو
افتراضي

ومن قال مايهون يالربع


ووجيهكم بيض


مرحبا







  رد مع اقتباس
قديم 29-11-2009, 11:21 AM   #9
معلومات العضو
عضو جديد
إحصائية العضو






حالة الاتصال والنقاط

الحالة : غير موجود
نقاطي :  10
آخر مواضيعي


 

الاوسمة والمراسله  


افتراضي شكرا لك

شـكــ وبارك الله فيك ـــرا لك ... لك مني أجمل تحية . ولكن عندي اضافة بسيطة يوجد عدد من الفرسان في قبيلة ال فرسان لم تذكرهم مثال
الشيخ الفارس/ مرزوق ابو خشبة والذي قتلوه الدواسر عندما اخذ ابل المساعرة وهو الذي تقول فيه شاعرة شهران وهي كانت حبيبته واخذوا ابله القوم وهو معها ففزع ورجع ابله بما فيها عمهوج ناقته المحبوبة
ياليتني معهم على خامسة خمس
وشوف عمهوج لمن دوه الها
صبو له الفنجال وارضوه لاحمس
وادعوه للكرمة لمن وافق الها
يانافدى اللي ماغدت فاطره رمس
اللي خذا شيخ المغيرة بدلها
واكثر غزواته كانت على الدواسر وخصوصاً المساعرة
وكذلك ابن عمه جحيش بن هطيل والذي قال فيه الشيخ العقيد /على بن راجح في المعركة مع الدواسر مثل جحيش ياصبيان عندما ذبح شيخ المساعرة الشيخ /نجل بن رويعي ولانه قام يزهمه الشيخ على بن راجح ويقول (واين اجحيش لعنبو من مدح جحيش) فنزل وقتل الشيخ نجل وكسر القوم فقال الشيخ على (مثل جحيش ياصبيان سعد ابو من سمت ولده جحيش) وهو مشهور في دياره هو واخوانه مرزوق ورفعان وكلهم قتلوا في المعارك







  رد مع اقتباس
قديم 29-11-2009, 11:29 AM   #10
معلومات العضو
ذهبي

الصورة الرمزية أبن وندهـ
إحصائية العضو






حالة الاتصال والنقاط

الحالة : غير موجود
نقاطي :  1605
آخر مواضيعي

 

الاوسمة والمراسله  


وسام الحضور الدائم 
وسام التميز 
افتراضي

ابيض وجه يابومحسن على طرح قصص بعض فرسان آل عاطف


والله يغفرلهم جميع واموات المسلمين


تحياتى لك







التوقيع

ABO.SAAD

  رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 02:18 PM.

جميع مايطرح من مواضيع ومشاركات لا تعبر عن رأي إدارة المنتدى إنما تمثل صاحبها فقط

 


Powered by vBulletin® Copyright ©2000 - 2014, Jelsoft Enterprises Ltd. , TranZ By Almuhajir